18-06-2016 16:34

Մի՛ օգնեք Ալիևների ռեժիմին. Խադիջա Իսմայիլովայի կոչը արևմտյան աստղերին

Ադրբեջանցի հայտնի լրագրող Խադիջա Իսմայիլովան, ով Ալիևների հանցավոր ռեժիմի ակտիվ քննադատներից մեկն է ու այժմ գտնվում է պայմանական ազատության մեջ, հանդես է եկել նոր հոդվածով:
«Այս շաբաթ հին Բաքվի փողոցներով անցնելու է «Ֆորմուլա- 1»-ի Գրան պրին, ինչի կապակցությամբ Ֆարել Ուիլյամսը, Քրիս Բրաունը, Էնրիկե Իգլեսիասն ու նրանց նմանները հրավիրվել են մրցարշավի երկրպագուներին զվարճացնելու, ինչպես նաև Ալիևների ղեկավարած երկիրը որպես երջանիկ ու նորմալ ազգ ներկայացնելու համար: Սակայն Ադրբեջանը կոռուպցիայով առաջնորդվող մի երկիր է, որտեղ պաշտոնյաներին կարելի է առնել ու ծախել, որտեղ կարելի է հանուն մեծ փողերի աչք փակել հանցավորության վրա: Միակ բանը, որ նրանք չեն կարող գնել, խոսքի ազատությունն է»,-նշվում է հոդվածի նախաբանում:

Այնուհետև Իսմայիլովան հիշեցնում է իր` կեղծ ու զավեշտալի մեղադրանքների հիման վրա բանտարկության մասին` ընդգծելով, որ իրեն ազատությունից զրկելու միակ պատճառն Ալիև ընտանիքի իրագործած հանցագործությունների մասին գրելն էր:

«Բանտից դուրս գալու միակ տարբերակն այսուհետ լռություն պահպանելու ու լրագրողական հետաքննություններով չզբաղվելու խոստումն էր: Սակայն ես դրան չհամաձայնեցի ու, նույնիսկ ճաղերի հետևում գտնվելով, շարունակեցի գրել: Երբ ինձ հարցրին, թե արդյոք կցանկանա՞մ, որ ընտանիքիս անդամները նամակով դիմեն նախագահին ու խնդրեն ինձ ազատ արձակել, ես ասացի` ոչ: Քանի որ համաձայնելու դեպքում ես կդառնայի մեծ ստի մի մասը, իսկ ես չեմ ուզում լինել բռնաճնշումների մեքենայի բաղադրիչներից մեկը»,-շարունակում է Իսմայիլովան` հիշեցնելով, որ ինքը պայմանական ազատության մեջ է հայտնվել միջազգային հանրության ու տարբեր իրավապաշտպան կազմակերպությունների ջանքերով միայն:

Լրագրողը նկատում է, որ Ադրբեջանի իշխանությունները վախենում են իր պես լրագրողներից ու ակտիվիստներից, քանի որ չեն կարող ենթարկել իրենց:

Ըստ նրա՝ իշխանությունները հուսահատ փորձեր են անում, որպեսզի Ադրբեջանն աշխարհին ներկայացնեն որպես լիբերալ ու բազմակարծությունը խրախուսող երկիր, սակայն այդ ամենը զավեշտալի է ու հակասում է քաղբանտարկյալների նման մեծ թվին: Նրանք երկրի չունեցած փողերով (նավթի գների անկման պատճառով եկամուտները կտրուկ նվազել են) միջազգային մակարդակի խոշոր մարզական միջոցառումներ են կազմակերպում` փորձելով դրանց միջոցով զարմացնել աշխարհին:

«Հետաքրքիր է` արդյոք Ֆարել Ուիլյամսն ու մյուս հրավիրված աստղերը մի պահ կշեղվե՞ն մարզական տոնից ու շարքային ադրբեջանցիներից կհետաքրքրվե՞ն` երջանի՞կ են նրանք իրականում, ուզո՞ւմ են այսպիսի մեգա միջոցառումներ հյուրընկալել մի երկրում, որտեղ բնակիչները չունեն անգամ հիմնական բժշկական ապահովագրություն: Բայց, միգուցե, նրանք չեն էլ հարցնի այդ մասին, քանի որ գիտեն` ադրբեջանցիների մեծ մասը, առաջնորդվելով ազատությունից զրկվելու վախով, չի հայտնի իր իրական կարծիքը: Միգուցե, նրանք, ում ազատությունը վտանգի տակ է, չեն կարող քննադատել ռեժիմին, բայց Իգլեսիասը, Բրաունն ու Ուիլյամսը կարող են: Այսպես վարվելու դեպքում նրանք չեն դառնա ստի քարոզչամեքենայի մի մասը»,-եզրափակել է Իսմայիլովան: