Այսօր, Կոտայքի մարզի ընդհանուր իրավասության դատարանում Վարդան Պետրոսյանի պաշտպան Նիկոլայ Բաղդասարյանը նշել է, թե բժիշկ Էդուարդ Ասատրանը կարծել է, թե Վարդան Պետրոսյանը ալկոհոլի ազդեցության տակ է, քանի որ նա ծիծաղել է եւ կատակել:
Էրեբունի հիվանդանոցի բժիշկը Վարդան Պետրոսյանին առաջին անգամ տեսնելով՝ արձանագրության մեջ գրել էր, թե նա ալկոհոլի ազդեցության տակ է, հետո երկու հարցական դրել կողքին:
՛՛Ծիծաղում էր, կատակով էր հարցերին պատասխանում, այդ պատճառով կարծեցի, թե ալկոհոլի ազդեցության տակ է: Բայց քանի որ վստահ չեմ եղել, կողքին դրել եմ երկու հարցական նշան: Չեմ կարող ասել՝ նա եղել է ալկոհոլի ազդեցության տակ, թե՝ ոչ: Երկու գրառումներս էլ կատարվել են միեւնույն ժամանակ միեւնույն գրիչով: Չի բացառվում, որ նրա վրայից եկող ալկոհոլի հոտը լիներ ճանապարհին նրա վերքերի մշակման եւ ներարկումների համար օգտագործած սպիրտի հետեւանքով՛՛,- հարցման պատասխանն ընթերցեց Նիկոլայ Բաղդասարյանը:
Դատավորը այն կցեց գործին:
Հիշեցնենք, որ Վարդան Պետրոսյանը 2013թ. հոկտեմբերի 20-ին, ժամը 22:10–ի սահմաններում, Կոտայքի մարզի Սարալանջ գյուղի կողմից դեպի Երեւան ուղղությամբ վարելիս «ԲՄՎ-320» մակնիշի մեքենայով բախվել է կայանած ՛՛Վազ 21214՛՛ մակնիշի մեքենայի հետնամասին։ Վթարի հետեւանքով ՛՛Վազ-21214՛՛ մակնիշի մեքենայի ուղեւորներ էդվարդ եւ էդգար Հայկի Հակոբյանները մահացել են, ուղեւորներ Տաթեւիկ Հակոբյանը, Հայկ Հակոբյանը, էմմա Հակոբյանը, ինչպես նաեւ վարորդ Արթուր Հակոբյանն ստացել են վնասվածքներ: Վարդան Պետրոսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 3-րդ մասի հատկանիշներով՝ ՛՛Ճանապարհային երթևեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ՛՛, նա կալանավորված է: