03-02-2016 09:46

ՌԴ-ում հրաձգության հետևանքով հայ գործարարներ են սպանվել

ՌԴ Լենինգրադի մարզի քննիչները քրեական գործ են հարուցել փոխհրաձգության փաստով, որը տեղի է ունեցել Շլիսելբուրգ քաղաքի ավտոսպասարկման կետերից մեկում։ Հրաձգության հետևանքով վիրավորվել է 5 մարդ, նրանցից երկուսը մահացել են։ Սպանվածներն ազգությամբ հայ գործարարներ են եղել։
Այժմ հետախուզվում են կոնֆլիկտի մյուս մասնակիցները։
Դեպքը տեղի է ունեցել 2016 թվականի հունվարի 31-ին՝ տղամարդկանց երկու խմբերի միջև սկսված վիճաբանությունից հետո։
«Կողմերից մեկը հրազեն է կիրառել, ինչի հետևանքով երկու տղամարդ մահացել է, երեքը բուժհաստատություններում են»,-ասված է Քննչական կոմիտեի տարածած հաղորդագրության մեջ։
Շտապօգնության ծառայությունն ահազանգ ստանալուց 15 րոպե անց դեպքի վայրում է եղել։ Նրանց խոսքով՝ այն, ինչի ականատեսն են եղել, հոլիվուդյան ֆիլմի տեսարան է հիշեցրել, տասնյակ պարկուճներ, ատրճանակներ և երկու դի։
«Սպանվածներից մեկը 1956 թվականին ծնված Հրայր Վարդանյանն է, մյուսը՝ 1971 թվականին ծնված Արմեն Խուրշուդյանը։ Հայտնի է, որ երկուսն էլ բիզնեսի հետ կապ ունեն և կոնֆլիկտի տարբեր կողմերում են եղել»,-պատմել են իրավապահ մարմինների ներկայացուցիչները։
Վերակենդանացման բաժանմունքում մնում է 26-ամյա Վախթանգ Սարգսյանը, նրա կյանքին վտանգ չի սպառնում։