Այսօր դատարանում, «Ցեղակրոն» կուսակցության ղեկավար Շանթ Հարությունյանի հայտարարեց, թե, ոչ ինքը, ոչ էլ իր ընկերները դատարանում արդարանալու կարիք չունեն։ Ավելին՝ ինքը դատարանում հանդես է գալու որպես իշխանություններին մեղադրող: Կենտրոն և Նորք-Մարաշ ընդհանուր իրավասության դատարանում դատավոր Մնացական Մարտիրոսյանի նախագահությամբ ընթացող դատական նիստին նոյեմբերի 5-ի իրադարձությունների տեսանյութերը հետազոտելուց հետո շուրջ 30 րոպե ելույթ ունեցավ Շանթ Հարությունյանը: Նա մասնավորապես բացատրեց, որ ինքը չի հայհոյել, այն ինչ ասել է ինքը, հայհոյանք չէ, հետո էլ ավելացրեց, թե չկա մի մարդ, որ կռվի ժամանակ չհայհոյի՝ «ուզում ա Պուտինը լինի, ուզում ա՝ Մակեդոնացին կամ Ստալինը»:
«Մի բառ կա, որ ես օգտագործել եմ, բայց դա հայհոյանք չի, ես ասել եմ «սուկա», դա նշանակում ա շան քած, իսկ այդպես ռուսները ասում են պատվեր կատարողին։ Այսինքն՝ ես համարում եմ ոստիկաններին ու պրովոկատորներին պատվեր կատարող ու դրա բնութագիրն եմ տվել էդ պահին: Ես ծանր հոգեվիճակում էի, որովհետև գալիս՝ ասում էին սնայպերով են խփելու, ու էդքանով հանդերձ ես բոլորին տանում էի իմ հետևից: Իսկ տղերքը մեղավոր չեն, եթե իրանք չանեինք նենց, ոնց որ արեցին, ես կթքեի իրանց էրեսին: Մենք Արցախյան շարժման ժամանակից պայքարել ենք, մինչև հիմա էլ պայքարում ենք մեր հայրենիքի համար»,-ասաց նա ու հավելեց, որ մարդիկ տարբեր բաների համար են պայքարում, բայց դրանք փողի համար է:
՛՛Իշխանությունն էլ է հասկանում, որ այսօր մարդիկ նյութականի համար են պայքարում ու իրանք շատ լավ հասկանում են, որ նյութականի համար պայքարողը չի կարա գնա մահվան, որովհետև ինքը իրա փողի համար ա կռիվ տալիս, որ գնա կայֆավատ անի: Պետք ա գաղափարի պայքար սկսենք: Այսօր արժեքների դեգրադացիա է սկսվել, ու դա կբերի տրամաբանության դեգրադացիայի: Հայ ժողովրդի մտածելակերպը խեղված է, պետք է շատ բան փոխել մեր մտածելակերպի մեջ՛՛,-ասաց նա:
Շանթը իր ելույթի ժամանակ հիշեց Հայոց պատմության տարբեր դրվագներ, թե ինչպես է Գևորգ Մարզպետունին իր մի քանի զինվորների հետ պայքար մղել ու հաղթել: Այնուհետև անդրադարձավ քերթողահայր Մովսես Խորենացու «Ողբին» և ընդգծեց, որ մինչ օրս որևէ բան չի փոխվել:
Հիշեցնենք, որ Շանթ Հարությունյանը և իր աջակիցները հեղափոխություն սկսելու կոչով երթի էին դուրս եկել 2013թ. նոյեմբերի 5-ին՝ Երևանում և ձերբակալվել էին։