Ղարաբաղա–ադրբեջանական շփման գծում տեղի ունեցած մարտական գործողությունները մտահոգում են նաև իսպանահայությանը։ Սակայն տեղի հայերը լայնամասշտաբ ցույց անելու խնդիր ունեն. Եվրոպայում կատարված ահաբեկչական գործողությունները եվրոպացիներին ստիպել են ավելի զգոն լինել և զգուշանալ նման միջոցառումներից։
Մադրիդում հայերը պատրաստվում են ցույց կազմակերպել Ադրբեջանի դեսպանատան առջև, սակայն դեռևս թույլտվություն չեն ստանում։ Իսպանական քաղաքներից միայն Վալենսիայում և Ալիկանտեում հայերը ցույցեր կազմակերպեցին, այն էլ` սակավաթիվ։ Իսպանիայում և Պորտուգալիայում Հայրապետական պատվիրակի փոխանորդ Տեր Սասուն ծայրագույն վարդապետ Զմրուխտյանը մեզ հայտնեց, որ Իսպանիայում իշխանությունը արտոնություն չի տալիս բազմամարդ ցույցերին։
«Եվրոպայում առհասարակ ցույցեր կազմակերպելու արտոնություն չեն տալիս` պատճառաբանելով, որ իրենք ցուցարարների անվտանգությունն ապահովելու բավարար ուժեր չունեն։ Զգուշանում են, որովհետև զանգվածային հավաքատեղիում կարող են ահաբեկչություն իրականացնել, ու նրանք դառնան պատասխանատու»,-ասաց Տեր Սասուն ծայրագույն վարդապետ Զմրուխտյանը։
Վալենսիայում, օրինակ, խաղաղ ցույցը նպատակահարմար էր, քանի որ այնտեղի պատգամավոր է Պեդրո Արգամունտը։ Նա բոլորին հայտնի է որպես ադրբեջանամետ պատգամավոր և պարբերաբար հանդես է գալիս հակահայկական հայտարարություններով։
«Նա ի պաշտոնե ազդեցիկ մարդ է. Եվրոպայի խորհրդի խորհրդարանական վեհաժողովի՝ ԵԽԽՎ-ի նախագահ է ընտրվել։ Աղբյուրներից հայտնի է, որ նա Ադրբեջանից գումարներ է ստանում և իր պաշտոնը վաճառքի հանում»,- ասաց նա։
Տեր Սասուն ծայրագույն վարդապետ Զմրուխտյանի խոսքով` այս պահին Իսպանիայի հայկական համայնքն ուզում է իսպանացի հեղինակավոր լրագրողների գտնել, ովքեր կհամաձայնեն մեկնել Արցախ ու տեղում ռեպորտաժներ պատրաստել։
«Հայ լրագրողների գրածն այնքան տեղ չի հասնում, ինչքան օտարինը»,- հավելեց նա։
Ապագա պլաններում է նաև ասուլիս կազմակերպելը, որին կմասնակցեն Իսպանիայում Հայաստանի դեսպանն ու իսպանացի պատգամավորները, ովքեր օբյեկտիվ կարծիք կհայտնեն ղարաբաղյան հակամարտության թեմայով։ Ինչ վերաբերում է իսպանահայերի` Արցախ մեկնելու ցանկությանը, ապա մեր զրուցակիցն ասաց, որ կոլեկտիվ մեկնելը խիստ ռիսկային է։
«Կան ազատամարտիկներ, որոնց առաջին ռեակցիան դա է` մարդ հավաքենք ու գնանք, բայց մարդ հավաքելով չէ։ Հիմա Իսպանիայում շատ լուրջ հետևում են, թե ով ուր է գնում, հատկապես երիտասարդները։ Հայտնի է, որ Եվրոպայից հազարավոր մարդիկ գնում են իսլամական բանակներում ծառայելու։ Դրա համար էլ կարող են սահմանը չանցած բռնեն ու երկար տարիներ նստացնեն առանց մի բան անելու»,-ասաց Տեր Սասուն ծայրագույն վարդապետ Զմրուխտյանը։
Ներկայում Իսպանիայում բնակվում է 55.000 հայ, որոնք ապրում են հիմնականում Մադրիդում (10.000), Բարսելոնայում (15.000), Սևիլիայում (1.000), Վալենսիայում (14.000) և Ալիկանտեում։