06-10-2014 13:48

Թուրքիայի խորհրդարանի որոշումը բացասաբար կազդի Սիրիայի հայ համայնքի վրա. թուրքագետ

Այսօր, լրագրողների հետ հանդիպմանը թուրքագետ Գևորգ Պետրոսյանն անդրադառնալով իսլամիստներին, նշեց, որ «Իսլամական պետությունը» այն խմբավորումներից չէ, որոնք Թուրքիայի կողմից աջակցություն են ստանում:
Անդրադառնալով Թուրքիայի խորհրդարանում ընդունված Սիրիա եւ Իրաք զորքեր մտցնելու մասին օրինագծին՝ թուրքագետը նշեց, որ այդ օրինագծի նոր եւ հետաքրքիր մասն այն էր, որ Թուրքիան այդպիսով փաստացի թույլատրել է արտասահմանյան ուժերին իր տարածքից հարվածներ հասցնել ԻՊ եւ նման այլ խմբավորումների գրոհայինների դիրքերին: «Թուրքիայի եւ ԻՊ հարաբերությունները բավական բարդ են, եւ դրանց միանշանական գնահատական տալը պարզապես անհնար է: Հատկապես վերջին տարիներին այդ հարաբերությունները բավական հակասական բնույթ են կրում», - նշել է Գեւորգ Պետրոսյանը:
Թուրքագետը նաև ասել է, որ Թուրքիայի խորհրդարանի որոշումը բացասաբար կազդի Սիրիայի հայ համայնքի վրա, քանի որ Թուրքիային ձեռնտու չէ հարեւանությամբ ուժեղ հայկական համայնք ունենալը: Ինչ վերաբերում է քրդերի գործոնին, ապա, ըստ թուրքագետի, ԻՊ գոյությունը Թուրքիայի շահերից է բխում, որին անհրաժեշտ է ցանկացած միջոցով նպաստել քրդերի եւ ԻՊ միջեւ բախմանը: «Սակայն սա այն նախապայմանը չէ, որը կհանգեցնի քրդերի անկախության», - նշել է Գեւորգ Պետրոսյանը: