Լեռնային Ղարաբաղի հակամարտության կարգավորման վերաբերյալ բանակցություններում խոսել որևէ փոխզիջումների մասին այս պահին հարկավոր չէ, քանի որ ոչ Հայաստանը, ոչ էլ Ադրբեջանը պատրաստ չեն դրանց, օգոստոսի 23-ին հրավիրված մամուլի ասուլիսի ժամանակ կարծիք է հայտնել «Կովկաս ինստիտուտի» տնօրեն, քաղաքագետ Ալեքսանդր Իսկանդարյանը:
Ալեքսանդր Իսկանդարյանի կարծիքով` այժմ բանակցություններ են ընթանում ավելի շատ սահմանագծում խաղաղության պահպանման և լարվածության բացառման ուղղությամբ: Դրանից հետո միայն կարելի կլինի խոսել թե կողմերն ինչ փոխզիջումների են պատրաստ գնալ: Հասկանալի է, որ Ադրբեջանը դրանց բոլորովին պատրաստ չէ: Իսկանդարյանի կարծիքով 2007թվականից՝ մադրիդյան սկզբունքների ի հայտ գալուց հետո Լեռնային Ղարաբաղի հակամարտության կարգավորման բանակցային գործընթացում ոչ մի նոր բան տեղի չի ունեցել:
«2007 թվականից, երբ ի հայտ եկան մադրիդյան սկզբունքները ԼՂ բանակցային գործում ինչ-որ նոր բան փոխվե՞ց, իհարկե՝ ոչ: Առաջարկները չեն փոխվել, այդ ամենը մադրիդյան սկզբունքների տարատեսակներ են: Երբևէ խոսք չի եղել այն մասին, որ Ադրբեջանը կճանաչի ԼՂ-ն, իսկ մենք ոչ մի սանտիմետր հող չենք տա, բանակցային սեղանին երբեք նման փաստաթուղթ կամ նման պայմանավորվածություն չի եղել», - նշել է Իսկանդարյանը: Ըստ քաղաքագետի ապրիլյան էսկալացիայից հետո նպատակ էր դրված նվազեցնել սահմանին ակտիվության մակարդակը, ինչը հնարավոր եղավ երկու կողմերի վրա ճնշում գործադրելուց հետո միայն:
«Շատ ակտիվորեն դա զգացվում էր մայիս - հունիս ամիսներին, սակայն այսօր չեմ կարծում, որ կարելի է մտածել բանակցություններում լուրջ առաջընթացի մասին: Ես բավականին թերահավատորեն եմ վերաբերվում ոչ միայն հակամարտության կարգավորմանը, այլև Ադրբեջանի կոմից սահմանին ակտիվության նվազեցման երկարաժամկետ պահպանմանը», - ասել է նա: