Հայատանի տնտեսական կարգավիճակին շատ ու շատ քաղաքական գործիչներ են անդրադարձել, հիմնական տեսակետը նույն է, այսօր չունենք տնտեսություն, եղածն էլ կորցնում ենք: ՀԱԿ վարչության անդամ Զոյա Թադևոսյանի հավաստմամբ տնտեսությունը միշտ էլ քաղաքականացված է եղել, լավ տնտեսության համար ղեկավարները պետք է ճիշտ քաղաքականություն բանեցնեն: Իսկ այս ոլորտում մենք այսօր ոչ մի ձեռքբերում չունենք: Չենք կարող անգամ բնութագրել, թե Հայաստանի տնտեսությունը վերելք է ապրել, թե՞ գահավիժել է:
Հայաստանը վերջին 15 տարիների ընթացքում դարձել է բիզնես ծրագիր, նշեց Զոյա Թադևոսյանը և հավելեց, որ ներդրումային իրավիճակը անկայուն է, կորցնում ենք աշխատույժը:
Ըստ բանախոսի, ներդրողներն այսօր բնավ հետաքրքրված չեն Հայաստանով: Հարկավոր է ոլորտը գայթակղիչ դարձնել, արտոնությունների համակարգ ներդնել: ՀԱԿ ներկայացուցիչը վստահ է, որ մենք օրեցօր կորցնում ենք մեր հնարավորությունները:
Այսօր Հայաստանում լուրջ խնդիր է դարձել արտագաղթը, վստահեցնում է Զոյա Թադևոսյանը և նշում , որ այն կանխելու համար հարկավոր է մարդկանց աշխատելու և արարելու հնարավորություն ընձեռել: Մեկ անձը կլանել է Հայաստանի զարգացման պայմանները, վստահեցնում է բանախոսը, ըստ նրա շատ կարևոր է փոքր և միջին ձեռնարկություններին աջակցելը: