2014 թվականին Մայդանում ցուցարարների սպանությունների գործի քննության շրջանակներում Ուկրաինայի նախկին նախագահ Վիկտոր Յանուկովիչն այսօր պատասխանելու է ուկրաինական դատարանի հարցերին։ Հարցաքննությունը անցկացվելու է տեսակապի միջոցով՝ Ռոստովի շրջանային դատարանից։
Յանուկովիչը և Ուկրաինայի ՆԳՆ ներքին զորքերի նախկին հրամանատար Ստանիսլավ Շուլյակը որպես վկա են անցնում «Բերկուտ» հատուկ զորքերի նախկին աշխատակիցների գործով։
Ուկրաինայի գործող իշխանությունների կարծիքով՝ հենց Յանուկովիչն է 2014 թվականի փետրվարին հրամայել կրակ բացել ցուցարարների ուղղությամբ։
Ուկրաինայի նախկին նախագահ Վիկտոր Յանուկովիչի հարցաքննությունը որպես վկա պատրաստվում է լուսաբանել ԶԼՄ-ների 300 ներկայացուցիչ: Այդ մասին հայտնել են Կիևի Սվյատոշինսկի վարչական շրջանի դատարանում: «Շատ ռուսական լրատվամիջոցներ են հավատարմագրվել»,- ասել են դատարանում:
Հիշեցնենք, որ Յանուկովիչը 2014 թվականի փետրվարի վերջին Ուկրաինայում անկարգությունների պատճառով փախել է երկրից, ինչից հետո Գերագույն ռադան օրենք է ընդունել նրան Ուկրաինայի նախագահի կոչումից զրկելու մասին։