Ուկրաինայի նախագահ Վիկտոր Յանուկովիչը հանդիպում է անցկացրել ընդդիմության երեք առաջնորդների՝ Արսենի Յացենյուկի, Վիտալի Կլիչկոյի և Օլեգ Տյագնիբոկի հետ:
«Բատկիվշինա» խմբակցության մամլո ծառայությանը հղումով, ընդդիմության առաջնորդների և նախագահի միջև հանդիպումը տեղի է ունեցել նախագահի վարչակազմի շենքում:
Նախագահի խորհրդական Աննա Գերմանի հաղորդմամբ՝ նախագահի հետ հանդիպմանը հաջորդել է ընդդիմադիրների հանդիպումը ճգնաժամի կարգավորման հարցով կազմավորված աշխատանքային խմբի հետ:
Հանդիպման ընթացքում Ուկրաինայի նախագահի վարչակազմի ղեկավար Անդրեյ Կլյուևը ընդդիմության առաջնորդների հետ քննարկում է ստեղծված իրավիճակից դուրս գալու ծրագիրը:
Յացենյուկը հանդիպման ավարտին հայտարարել է, որ Յանուկովիչի հետ բանակցություններում հաջողվել է ընդհանուր հայտարարի գալ. որոշվել է սկսել երկրում կայունություն հաստատելու շուրջ բանակցությունները: Նա նաև ասել է, որ իշխանության՝ Մայդանը ուժով ցրելու որոշումը կասեցված է: