fordes.ru-ն հայտնում է, որ ՌԴ մայրաքաղաք Մոսկվայի ամենահայտնի երկար կառուցվող ջրաշխարհը, որը գտնվում է Ամինևսկոյե մայրուղում, փոխել է սեփականատիրոջը:
Հայազգի գործարար Սամվել Կարապետյանի «Տաշիր» ընկերությունը 100 մլն դոլարով գնել է Մոսկվայի հարավ-արևմուտքում գտնվող բազմահարկ լքված շինությունը, որտեղ անցկացվել են «Բրիգադա» հայտնի սերիալի վերջին մասի նկարահանումները, նշել է ընկերության փոխնախագահ Իգոր Բուլատովը։
Բազմաֆունկցիոնալ համալիրի շինարարությունը, որի ընդհանուր տարածքը 45.000 քմ է, սառեցվել է 2001-ին։ «100 մլն դոլարը 45.000 քմ տարածքով կիսակառույցի համար չափազանց մեծ գումար է թվում։ Սակայն եթե «Տաշիրին» հաջողվել է համաձայնեցնել քաղաքի (իշխանությունների) հետ այդ տարածքում շենքի քանդումը և նոր, ավելի մեծ շենքի շինարարությունը, ապա արժեքը բավարար է»,- նշել է Մոսկվայի անշարժ գույքի կենտրոնական բորսայի կառավարիչ գործընկեր Արտյոմ Ցոգոևը։
Կիսակառույց շենքը կքանդվի, ջրաշխարհի փոխարեն Սամվել Կարապետյանի ընկերությունը նախատեսում է կառուցել բազմաֆունկցիոնալ համալիր՝ առևտրային և գրասենյակային հատվածներով, ինչպես նաև բնակարաններ։ Ապագա կառույցի ընդհանուր տարածքը կկազմի 125.000 քմ։ Նախատեսվում է օբյեկտը կառուցել 2015-ին։