Բաքվում անցկացված Եվրոպայի խորհրդի խորհրդարանական վեհաժողովի (ԵԽԽՎ) բյուրոյի նիստի ընթացքում քաղաքական սկանդալ է տեղի ունեցել։
Ադրբեջանական haqqin.az կայքը տեղեկացնում է, որ Բյուրոն որոշել է առաջիկա 2 տարիների ընթացքում չեղյալ համարել Ադրբեջանում կայանալիք բոլոր նիստերը։
Այդ որոշումն ուժի մեջ է մտնելու 2014թ.-ի հունիսի մեկից և ընդունվել է՝ պայմանավորված Ադրբեջանի իշխանությունների կողմից ԵԽԽՎ փոխնախագահին մուտքի արտոնագիր չտրամադրելու քայլով։
ԵԽԽՎ փոխնախագահ, ֆրանսիացի պատգամավոր Ռենե Ռուկեի մուտքն Ադրբեջան արգելվել էր, քանի որ Լեռնային Ղարաբաղ այցելելու պատճառով վերջինս ընդգրկվել է Ադրբեջանի համար անցանկալի անձանց «սև ցուցակում»։
ԵԽԽՎ բյուրոն կարծում է, որ փոխնախագահին վիզա չտրամադրելը խախտում է կառույցի անդամների ազատ տեղաշարժի արտոնությունը։
Սահմանափակումը, սակայն, չի տարածվելու ընտրությունների ժամանակ ԵԽԽՎ-ի մոնիթորինգային առաքելության վրա։
Բացի այդ, ԵԽԽՎ-ն կարող է չեղյալ համարել այդ որոշումը, եթե Վեհաժողովի անդամների ազատ տեղաշարժն ապահովվի։
Նման որոշում 2013թ.-ի նոյեմբերին ընդունվել էր Վրաստանի վերաբերյալ։
Ադրբեջանական լրատվամիջոցները Ռուկեին բնութագրում են որպես հայամետ գործիչ և նշում, որ նա իր դիրքորոշումների մասին բազմիցս հայտնել է ԵԽԽՎ-ում։