22-09-2016 12:34

Մեծ պանդան կմնա Վայրի բնության համաշխարհային հիմնադրամի խորհրդանիշը

Վայրի բնության համաշխարհային հիմնադրամը (World Wildlife Fund, WWF) մտադիր չէ հրաժարվել իր ներկա խորհրդանիշից՝ մեծ պանդայից, չնայած կենդանին այս տարվանից արդեն անհետացող տեսակ չի համարվում: Միջազգային բնապահպանական կազմակերպությունը կարող էր որպես խորհրդանիշ որեւէ այլ կենդանու պատկեր ընտրել, որին ի տարբերություն պանդայի, անհետացման վտանգ է սպառնում, սակայն հակված չէ շտապել այս հարցում:

«Մեր լոգոտիպն այնքան հայտնի է ամբողջ աշխարհում, որ այն դժվար է փոխելը: Վտանգ կա, որ դա կթուլացնի մեզ»- ասել է WWF շվեյցարական բաժանմունքի ներկայացուցիչ Պյերետա Ռեյը:

Բնության պահպանման միջազգային միությունը, որի շտաբ բնակարան շվեյցարական Գլանդե քաղաքում է գտնվում, մեծ պանդային «վտանգված տեսակի» կատեգորիայից պաշտոնապես փոխադրել է «խոցելի վիճակում» գտնվողների կատեգորիա: Հիմա վայրի բնության մեջ մոտ 2060 պանդա կա, ինչը կրկնակի շատ է, քան անցած դարի 80-ականներին:

Սակայն Վայրի բնության համաշխարհային հիմնադրամը կարծում է, որ չարժե բավարարվել այս դրական փոփոխությունով: Չէ ՞ որ պանդաների գոյությունը դեռ խոցելի է գնահատվում:

WWF –ում մեծ պանդան համարում են այդ տեսակի պաշտպանության համար հասարակական արշավի հաջողության խորհրդանիշը: Եթե WWF –ը հավատարիմ է մնացել իր խորհրդանիշին՝ 1961-ին կազմակերպության ստեղծումից ի վեր, ապա շվեյցարական Pro Natura բնապահպանական կազմակերպությունը, որի խորրդանիշն ալպիական քարայծն է, արդեն մեկ անգամ փոխել է իր լոգոտիպը: Բայց դա վաղուց էր ՝ 1916-ին, ստեղծումից յոթ տարի անց: Ի սկզբանե կազմակերպության խորհրդանիշը արջն էր, որը հետո իր տեղը զիջեց այծեղջյուրին: