Բավ է պառակտվել
25-02-2014 14:59

Այսօր Զորավար Անդրանիկի ծննդյան օրն է

Այսօր Զորավար Անդրանիկի՝ Անդրանիկ Թորասի Օզանյանը ծննդյան օրն է։ Անդրանիկը ծնվել է 1865թ. փետրվարի 25-ին Արևմտյան Հայաստանի Շապին Գարահիսար քաղաքում։ Տեղի Մուշեղյան վարժարանի շրջանավարտի կյանքում դպրոցն ավարտելուց մեկ տարի էլ չանցած՝ սկիզբ է առնում թուրքական բռնություններից ու ստորացումներից հայերի ազգային արժանապատվության ու կյանքի ապահովության պաշտպանությանն ուղղված գործունեությունը։ Առաջինը հայ բնակչությանն ահաբեկող ժանդարմի սպանությունն էր, որի հետևանքը լինում է բանտարկությունը, այնուհետև՝ փախուստ բանտից։ Այդ օրվանից մինչև իր մահը՝ 1927թ. օգոստոսի 31-ը, Անդրանիկ անունով հայտնի հայդուկը, գեներալը, զորավարը մասնակցում է բազմաթիվ ազատագրական մարտերի ու կռիվների, անցնում թեժ իրադարձությունների բովով մի տարածաշրջանում, որտեղ մոլեգնում էին թուրքական ահաբեկչությունը, հեղափոխական տրամադրությունները, Առաջին համաշխարհային պատերազմի գործողությունները, իրականություն էր դառնում հայերի ցեղասպանության դաժան ծրագիրը, տիրում էին հիվանդությունները, գժտությունները, քաղաքական մեծ խաղեր էին իրականացվում։ Լեգենդ դարձած նրա կյանքն ընդհատվեց հայրենիքից շատ հեռու՝ ԱՄՆ Չիքո քաղաքի մի առողջարանում։ Նույն տարվա սեպտեմբերին Զորավարի դին տեղափոխվում է Փարիզ և վերահուղարկավորվում Պեր-Լաշեզ գերեզմանոցում։ 2000թ. զորավարի մասունքները ամփոփվեցին Երևանի Եռաբլուր պանթեոնում։ Զորավար Անդրանիկի անունով կոչվել են հրապարակներ, դպրոցներ, փողոցներ, թաղամասեր, նրա արձաններն են տեղադրվել շատ բնակավայրերում, նրա կերպարը դարձել է բազմաթիվ գեղարվեստական ստեղծագործությունների նյութ։