Նախագահ Սերժ Սարգսյանն այսօր ընդունել է Վրաստանի ներքին գործերի նախարար Ալեքսանդր Չիկաիձեին: Նախագահը ողջունել է հյուրին և հույս հայտնել, որ նրա այցը կլինի արդյունավետ և կնպաստի Հայաստանի ու Վրաստանի ոստիկանական կառույցների համագործակցության հետագա խորացմանը, որի համար, Նախագահի համոզմամբ, ձևավորված է իրավապայմանագրային անհրաժեշտ դաշտ:
Նախարար Չիկաիձեն գոհունակությամբ է արձանագրել, որ Հայաստանի ոստիկանության հետ Վրաստանի ներքին գործերի նախարարությունը սերտ գործընկերային հարաբերություններ ունի, և իր այցի նպատակն է՝ առավել ամրապնդել այդ հարաբերությունները, քննարկել փոխգործակցության հետագա զարգացմանը վերաբերող հարցեր: Զրուցակիցները համակարծիք են եղել, որ երկու հարևան և դարավոր բարեկամական կապեր ունեցող երկրները ժամանակակից մարտահրավերներին դիմակայելու և տարածաշրջանում ընդհանուր մտահոգության խնդիրներին արդյունավետ լուծումներ գտնելու գործում պետք է շարունակաբար զարգացնեն համագործակցությունը, ինչին նպաստում են հայ-վրացական բարձր մակարդակի քաղաքական երկխոսությունը, փոխայցելություններն ու կառուցողական և ջերմ հարաբերությունները: