22-02-2014 11:53

Ոստիկանությունն առաջարկում է ԶԼՄ-ին, զանգվածային ակցիաների ժամանակ հատուկ բաճկոններ կրել. Տեսանյութ

Երեկ, փետրվարի 21-ին, ոստիկանության նախաձեռնությամբ տեղի է ունեցել հանդիպում, որին մասնակցում էին ՀՀ ոստիկանության բարձրաստիճան պաշտոնյաներ, զանգվածային լրատվության միջոցների ղեկավարներ, հասարակական կազմակերպությունների, ԵԱՀԿ և Մարդու իրավունքների պաշտպանի գրասենյակի ներկայացուցիչներ:
Ոստիկանության պետի տեղակալ Արթուր Օսիկյանը նշել է, որ վերջին շրջանում քաղաքացիական հասարակության նախաձեռնությամբ հանրապետությունում իրականացվող հավաքների ընթացքում ՀՀ ոստիկանության կողմից հասարակական կարգի և անվտանգության ապահովմանն ուղղված գործողությունները միանշանակ գնահատականի չեն արժանացել քաղաքացիական հասարակության եւ որոշ ԶԼՄ-ների կողմից, մասնավորապես՝ տարաբնույթ մեկնաբանություններ են տրվում նշված միջոցառումների ժամանակ լրագրողների աշխատանքի եւ ոստիկանության ծառայողների գործողությունների վերաբերյալ:
ՀՀ ոստիկանությունը, կարեւորում է հանրության ներկայացուցիչների տեսակետները, եւ իրավապահների ու լրատվամիջոցների ղեկավարների հանդիպումը «կլոր սեղանի» շուրջ ուղղված էր համագործակցության դաշտի կանոնակարգմանը, հավաքների ընթացքում ոստիկանության ծառայողների եւ լրագրողների աշխատանքի սկզբունքների, իրավասությունների ու պարտականությունների հստակեցմանը:
Ոստիկանությունը, մասնավորապես առաջարկեց հստակեցնել՝ ԶԼՄ ներկայացուցիչը զանգվածային միջոցառման ընթացքում կարո՞ղ է հանդես գալ որպես միջոցառման մասնակից, թե՞ բացառապես պետք է իրականացնի իր մասնագիտական գործառույթները: Միեւնույն ժամանակ՝ առաջարկվեց, որ ցանկալի կլինի զանգվածային միջոցառումները լուսաբանող լրագրողները տարբերակիչ նշաններ կամ հատուկ բաճկոններ կրեն, ինչը նրանց ճանաչելի կդարձնի իրավապահների համար ու զերծ կպահի անցանկալի միջադեպերից:
Բուռն քննարկումից հետո ոստիկանության այս առաջարկին հավանություն տվեցին ԵԱՀԿ ներկայացուցիչներն ու հանդիպման այլ մասնակիցներ, իսկ որոշ լրատվամիջոցների ղեկավարներ առաջարկեցին անցանկալի միջադեպերը բացառելու նպատակով ոչ թե դիմել տարբերակիչ նշանների կիրառմանը, այլ բարձրացնել հասարակական կարգը պահպանող ոստիկանների մասնագիտական պատրաստվածության մակարդակը:
ԶԼՄ-ների մի շարք ղեկավարներ էլ բերեցին վերջին շրջանում լրագրողի մասնագիտական պարտականությունների կատարմանը խոչընդոտելու դեպքերի օրինակներ, որոնց վերաբերյալ ոստիկանության ներկայացուցիչը տվեց պարզաբանումներ: Հանդիպման ավարտին ոստիկանության ներկայացուցիչները պատրաստակամություն հայտնեցին շարունակելու համագործակցության ուղիների որոնումը, ինչպես եւ երկուստեք հետաքրքրություն ներկայացնող հարցերի շուրջ նման քննարկումները դարձնել պարբերական: