Գյումրիում Ավետիսյանների սպանության մեջ մեղադրվող ռուս զինծառայող Վալերի Պերմյակովը հրաժարվել է դատարանում ցուցմունք տալ: Դատավոր Հարություն Մովսիսյանը կրկին ամբաստանյալին բացատրել է իր իրավունքները: Պերմյակովը գլուխը տարուբերելով հայտարարել է. «Ես հրաժարվում եմ ցուցմունք տալ»: Այդուհանդերձ, ամբաստանյալի փաստաբան Էդուարդ Աղաջանյանը մի քանի հարց է ուղղել նրան՝ կապված առողջական վիճակի հետ: Հարցին, թե կարո՞ղ է մասնակցել դատական նիստին, Պերմյակովը պատասխանել է, որ առողջական վիճակը նորմալ է: Հարցին, թե ինչ-որ բան իրեն կաշկանդո՞ւմ է, նա բացասական պատասխան է տվել: «Ձեզ որեւէ մեկը սպառնացե՞լ է, որ ցուցմունք չտաք դատարանում», հարցին էլ արձագանքել է՝ «ոչ»: Պերմյակովը հրաժարվել է պատասխանել հարցին, թե արդյոք իր որոշումը պայմանավորված է կյանքի հանգամանքներով կամ պաշտպանական մարտավարությամբ, կա՞ արդյոք կյանքի եւ առողջության վտանգ: Հարցին, թե տեղյա՞կ է, որ ցուցմունք տալուց հրաժարվելու դեպքում հրապարակվելու են քննության ընթացքում տված իր ցուցմունքները, եւ դրանք կարող են մեկնաբանվել իր դեմ, ամբաստանյալը դրական պատասխան տվեց: Նա դրական պատասխանեց նաեւ հարցին, թե տեղյա՞կ է, թե ինչում են իրեն մեղադրում եւ ինչ պատիժ է նախատեսված օրենքով դրա համար: Դատավորը հիշեցրեց, որ նախկինում Պերմյակովն ամբողջությամբ ընդունել է մեղադրանքը: Հարցերի մի մասին ամբաստանյալը հրաժարվեց պատասխանել: Այսպես, Պերմյակովը չպատասխանեց հարցերին, թե արդյոք մտադիր է եղել ավազակային հարձակում իրականացնել, թե՞ այլ նպատակ է ունեցել, որ առանձնակի դաժանությամբ սպանություն է կատարել, որ սպանությունը կատարվել է շահադիտական նպատակներով, որ մոտեցել է հայ-թուրքական սահմանին՝ նպատակ ունենալով ապօրինաբար հատել այն: Դատախազի ճշտող հարցին, թե կա՞ն հանգամանքներ, որոնք խանգարում են իրեն ցուցմունք տալ, Պերմյակովը նույնպես հրաժարվեց պատասխանել: Դատարոնը որոշեց ցուցադրել Պերմյակովի հարցաքննությունների տեսագրությունները: