05-03-2014 17:18

Վարչապետ Տիգրան Սարգսյանը հարգանքի տուրք է մատուցել Վազգեն Սարգսյանի հիշատակին

Այսօր՝ մարտի 5-ին, լրանում է հայոց սպարապետ, Հայաստանի Հանրապետության ազգային հերոս, Արցախի հերոս Վազգեն Սարգսյանի ծննդյան 55-րդ տարեդարձը: Սպարապետի հիշատակին հարգանքի տուրք մատուցելու նպատակով վարչապետ Տիգրան Սարգսյանն այցելել է ՀՀ ՊՆ «Եռաբլուր» զինվորական պանթեոն, ծաղիկներ դրել նրա շիրմին և հայրենիքի պաշտպանության համար զոհված ազատամարտիկների հուշակոթողներին: Այս մասին տեղեկացնում է ՀՀ կառավարության տեղեկատվության և հասարակայնության հետ կապերի վարչությունը։

Վարչապետին ուղեկցում էին ՀՀ պաշտպանության նախարար Սեյրան Օհանյանը, Երևանի քաղաքապետ Տարոն Մարգարյանը, Երկրապահ կամավորական միության (ԵԿՄ) վարչության նախագահ Մանվել Գրիգորյանը, պաշտոնատար այլ անձինք:

Այնուհետև կառավարության ղեկավարը ներկա է գտնվել սպարապետ Վազգեն Սարգսյանի ծննդյան 55-ամյակին նվիրված և պատանի երկրապահ կամավորականների հանդիսավոր երդման արարողությանը, դիտել ԵԿՄ Երևանի և մարզային ստորաբաժանումների ցուցադրական ելույթները: