Երևանի Սարի թաղում գիշերը ոստիկանների և ցուցարարների միջև տեղի ունեցած բախումներից հետո Մարդու իրավունքների պաշտպանի գրասենյակի ներկայացուցիչները վաղ առավոտից իրականացվում են այցեր Ոստիկանության բաժիններ:
Ըստ ՄԻՊ տարածած հաղորդագրության՝ առկա են հաղորդումներ ինչպես քաղաքացիներին անհիմն բերման ենթարկելու, այնպես էլ նրանց նկատմամբ բռնություն գործադրելու, զանգի իրավունքը չապահովելու վերաբերյալ:
Արձանագրվել են նաև դեպքեր փաստաբանի մուտքը ոստիկանության բաժիններ խոչընդոտելու վերաբերյալ:
«Ոստիկանության ծառայողները չունեն որևէ իրավունք խոչընդոտելու փաստաբանի մուտք ոստիկանության բաժին կամ բերման ենթարկվածի պահման վայր: Այս պահանջը չապահովելը օրենքի կոպիտ խախտում է: Այցերի առաջնահերթ նպատակներից է ապահովել այդ իրավունքի իրացումը»,– ասվում է հաղորդագրությունում: