ՀՀ մշակույթի նորանշանակ նախարար Արմեն Ամիրյանն այսօր կառավարության նիստից առաջ լրագրողների հետ զրույցում նշել է, որ աշխատելու է բաց և չափազանց թափանցիկ:
Պատասխանելով այն հարցին՝ թե որն է եղել իր առաջին քայլը, երբ իմացել է, որ նշանակվել է նախարար՝ Արմեն Ամիրյանն ասաց. «Գնեցի մի փունջ վարդեր և եկա տուն: Զանգը տվեցի, կինս բացեց, գրկախառնվեցի և ականջին շշնջացի՝ սիրելիս, ես իմ ժամանակի մեծ մասը հատկացնելու եմ ուրիշին: Երբ որ զգացի թրթիռն իմ գրկում, ասացի՝ հանգստացիր, ես այդ ժամանակը նվիրելու եմ հայրենի մշակույթին և այն ծառայությանը, որին կոչված եմ»:
Արմեն Ամիրյանը նաև ավելացրեց, որ կադրերի փոփոխություն չի պատրաստվում անել:
«Ես ձևակերպում եմ խնդիրները և այդ խնդիրների մեջ եթե կարող են տեղավորվել, ապա կարող եմ աշխատել բոլորի հետ: Եթե չեն տեղավորվի, ինքնաբերաբար այդ մարդիկ կփոխարինվեն այլ աշխատողներով, քանի որ ինձ համար կարևորագույնն այն մշակույթն է և այն խնդիրները, որոնք ձևակերպվելու են մշակույթի զարգացման մեջ»,- ընդգծեց մշակույթի նախարարը: