27-11-2014 18:03

Հայ-թուրքական սահմանին սահմանախախտ է ձերբակալվել

Հայ-թուրքական սահմանին ձերբակալվել է Իրանի քաղաքացի, ով մտադրվել էր ապօրինի հատել պետական սահմանը: ՌԴ ԱԴԾ-ի Սահմանապահ վարչությունը հայտնում է, որ իրավախախտի ինքնությունը պարզվել է:

ԱԴԾ ՍՎ-ի հաղորդագրությունում մասնավորապես ասված է.

«Հայաստանի Հանրապետությունում Ռուսաստանի ԱԴԾ Սահմանապահ վարչությանը պետական սահմանի պաշտպանության գործում իրենց ուժերի սահմաններում կամավոր հիմունքներով օգնություն են ցուցաբերում տեղի բնակիչները, որոնք միավորված են ժողովրդական կամավորական դրուժինաներում: Շնորհիվ զգոնության, վճռականության եւ ընկերական փոխօգնության՝ ձերբակալվում են պետական սահմանը, սահմանային ռեժիմը եւ պետական սահմանի ռեժիմը խախտողները: Այսպես, նոյեմբերի 24-ի լույս 25-ի գիշերը Շիրակի մարզի Գտաշեն գյուղի բնակիչ Արմեն Է.-ն անհայտ անձի է հայտնաբերել, որը հետաքրքրվում էր՝ ինչպես անցնել հայ-թուրքական սահմանի կողմ: Արմենը, լինելով կամավորական դրուժինայի անդամ, հաղորդել է սահմանապահ ջոկատին եւ միայնակ փորձել ձերբակալել իրավախախտին: Անհայտ անձը փորձել է փախչել դեպի պետական սահման: Լենինականի սահմանապահ ջոկատի զինծառայողները մի քանի րոպեից փակել են պետական սահմանի այդ հատվածը: Արմենը օգնության է կանչել համագյուղացիներին եւ ազդանշանային համալիրից 200 մետր հեռավորության վրա անծանոթին ձերբակալել են: Ստուգումների ընթացքում պարզվել է, որ ձերբակալվածը ԻԻՀ-ի քաղաքացի է՝ 1976 թ. ծնված: Հարցման ընթացքում նա բացատրել է, որ մտադրվել էր ապօրինի հատել սահմանը եւ Թուրքիա մեկնել: Իր արարքի դրդապատճառը պարզաբանել է անձնական խնդիրներով: Նոյեմբերի 25-ին ձերբակալվածը հանձնվել է ՀՀ ԱԱԾ աշխատակիցներին, որոնք կպարզեն կատարվածի բոլոր հանգամանքները: Սա սահմանամերձ բնակավայրերի բնակիչների խիզախության առաջին դեպքը չէ: Այսպես, այս տարվա սեպտեմբերին Արտաշատի սահմանապահ ջոկատի հատվածում (Երասխ բնակավայրում) տեղի երկու բնակիչներ Պետրոսյան Ռաֆիկը եւ Դավթյան Կարոն ձերբակալել են Աֆղանստանի քաղաքացու՝ քաջություն եւ վճռականություն դրսեւորելով: Դրուժինայի անդամներն իրենց հմուտ գործողությունների համար պարգեւատրվել են արժեքավոր նվերներով: 2014 թ. կամավորական դրուժինաների անդամների մասնակցությամբ Սահմանապահ վարչության տեղամասում ձերբակալվել է 9 իրավախախտ: Հայտնի փաստ է, որ սահմանի հուսալի պաշտպանությունն անհնար է առանց տեղի բնակիչների մասնակցության, նրանց զգոնությունից եւ արիությունից է նախեւառաջ կախված իրենց հարազատների անվտանգությունը: ՀՀ-ում ՌԴ ԱԴԾ վարչությունը հատուկ շնորհակալություն է հայտնում սահմանամերձ բնակավայրերի բոլոր բնակիչներին՝ պետական սահմանի պաշտպանության գործում ցուցաբերած գործուն աջակցության համար»: