Առողջապահության նախարարությունը զինված խմբին կոչ է անում հային վայել մոտեցում ցուցաբերել և առաջին հերթին ազատ արձակել բուժքրոջը։
Այս մասին ասվում է նախարարության հաղորդագրության մեջ, որը մեջբերում ենք ամբողջությամբ. «Արդեն 52 ժամ է, ինչ շտապ բուժօգնության երկու բժիշկը և բուժքույրը ոստիկանության պարեկապահակային ծառայության գնդի տարածքում պատանդի կարգավիճակում են։
Երեկ նրանց ազատ արձակելու բազում կոչերին միացան նաև Երևանի մի շարք բժշկական կազմակերպությունների բժիշկներն ու բուժքույրերը` շեշտը դնելով հատկապես իրենց գործընկերուհու` բուժքույր Մալինա Մարգարյանին ազատելուն։
Դժվար է հասկանալ հայ տղամարդկանց այն քայլը, երբ իրենց կողքին ստիպողաբար պահում են կնոջը, այն էլ բուժքրոջ, ով, եթե չասենք իր առաքելությամբ, ապա գոնե մասնագիտության և աշխատանքի բերումով մշտապես աջակցություն ու բժշկական օգնություն է ցուցաբերել դրա անհրաժեշտությունն ունեցողներին։
ՀՀ առողջապահության նախարարությունը ևս մեկ անգամ դատապարտում է զինյալ խմբի կողմից բուժաշխատողներին պատանդ վերցնելու ամբողջ աշխարհում անընդունելի համարվող քայլը, կոչ է անում հային վայել մոտեցում ցուցաբերել և առաջին հերթին ազատ արձակել բուժքրոջը։ Միաժամանակ, հորդորում ենք սառը տրամաբանությամբ ընդունել առանց որևէ նախապայմանի բոլոր բուժաշխատողներին ազատ արձակելու բազում հորդորները, կոչերն ու պահանջները։
Ողջ աշխարհում գրված ու չգրված օրենքներով չընկալվող այս գործողությունը բնավ պատիվ չի բերում ոչ ձեր արժանապատվությանը և ոչ էլ ձեր կողմից ներկայացվող գաղափարներին»։
Հիշեցնենք, որ ՊՊԾ գնդում ներկայում պատանդի կարգավիճակով պահվում են Մալինա Մարգարյանը, Սալվադոր Խեչոյանը և Նորայր Թևանյանը։