07-09-2016 11:34

Ամենայն Հայոց Կաթողիկոսը հանդիպել է զինվորների հետ

Արցախում Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Գերագույն հոգևոր խորհրդի անդամների ուղեկցությամբ նախօրեին այցելել է ԼՂՀ Պաշտպանության բանակի N զորամաս, ուր հանդիպել է հրամանատարական կազմի և զինվորների հետ։ Այս մասին հայտնում են Մայր Աթոռի տեղեկատվական համակարգից:
Զորամասում Ամենայն Հայոց Հայրապետին ու ԳՀԽ անդամներին դիմավորել է և բարիգալստյան խոսքով ողջունեց ԼՂՀ Պաշտպանության նախարար գեներալ-լեյտենանտ Լևոն Մնացականյանը։
Այնուհետև շարված զորքին իր հայրապետական օրհնությունն է բաշխել Գարեգին Բ Ամենայն Հայոց Կաթողիկոսը։

«Պահպանիչ» աղոթքից հետո Նորին Սրբությունն իր պատգամն է բերել զինվորներին՝ ուրախություն հայտնելով Արցախ իր այցի շրջանակներում ՊԲ զինվորների և զորահրամանատարների հետ հանդիպման հնարավորության համար։ «Եկել ենք մեր գնահատանքը և սերը արտահայտելու ձեզ, նաև բերելու ձեզ մեր խոնարհումը ձեր իրագործած սխրանքների համար, որոնց մենք ականատես դարձանք ապրիլյան պատերազմի օրերին, թե ինչպիսի քաջազունությամբ դուք կասեցրեցիք ադրբեջանական զորքերի հարձակումը, ետ շպրտեցիք նրանց մեր սահմաններից։ Մեր խոնարհումն ենք բերում քաջարի զինվորներին՝ մեր ազգի հերոս զավակներին, ովքեր իրենց կյանքով այդ օրերին պաշտպանեցին մեր Հայրենիքը։ Թող երկնքից միշտ լույս և օրհնություն իջնի նրանց շիրիմներին։ ․․․Փա´ռք ձեզ, հայոց բանակի քաջարի մարտիկներ։ Վերստին, փա´ռք ձեր ընկերներին, որոնք հանգչում են Արցախի և Հայաստանի նվիրական և սուրբ հողում», - ասել է Գարեգին Բ Կաթողիկոսը։