18-04-2016 12:17

Ամենաանվտանգ երկրների ցանկում Հայաստանը 25-րդն է, Ադրբեջանը՝ 31-րդը

Աշխարհի 117 երկրների շարքում իր անվտանգ լինելով Հայաստանը 25-րդ տեղում է։ Numbeo-ի պատվերով հրապարակվել է Crime Index For Country 2016 զեկույցը, որտեղ ներկայացված են աշխարհի տարբեր երկրներում հանցագործության և ապահովության ինդեքսը, որի հիման վրա հասկանալի է դառնում, թե որ երկրներն են աշխարհում առավել անվտանգ եւ վտանգավոր։  Հրապարակված զեկույցի տվյալների համաձայն՝ որտեղ ներկայացված են աշխարհի 117 երկրները, Հայաստանը գտնվում է 25-րդ հորիզոնականում, ըստ որի, մեր երկրում քրեածին իրավիճակը գնահատվում է 31,11 տոկոս, իսկ անվտանգության ինդեքսը՝ 68,89 տոկոս։ Հայաստանին իրենց ցուցանիշով շատ մոտ են Իսրայելը, Կիպրոսը, Նիդերլանդները, Լեհաստանն ու Իսպանիան։

Հարավային Կովկասի երկրներից առաջատարը Վրաստանն է (6-րդ հորիզոնական), որտեղ անվտանգության ինդեքսը կազմում է 77,84 տոկոս։ Իսկ Ադրբեջանը գտնվում է 31-րդ հորիզոնականում, որտեղ անվտանգության ինդեքսը 67,61 տոկոս է։

Ռուսաստանը այս առումով ավելի անմխիթար վիճակում է (68-րդ տեղ), որտեղ քրեածին վիճակը գնահատվում է 47,31 տոկոս, իսկ անվտանգության ինդեքսը՝ 52,69 տոկոս։

Հետխորհրդային երկրներից ամենավտանգավորը համարվում է Ուկրաինան, որը հանգրվանել է 74-րդ հորիզոնականում։

Մեր հարեւան Թուրքիան եւս մեզնից ավելի վատ վիճակում է (47-րդ տեղ), որտեղ քրեածին վիճակը գնահատվում է 39,43 տոկոս, իսկ անվտանգության ինդեքսը՝ 60,57 տոկոս։ Իրանն ավելի վատ վիճակում է (82-րդ տեղ), որտեղ քրեածին իրավիճակը գնահատվում է 52,37 տոկոս, իսկ անվտանգության ինդեքսը՝ 47, 63 տոկոս։

Աշխարհում ամենաապահով երկիրն, ըստ այս ցանկի, Հարավային Կորեան է, որտեղ հանցագործության ինդեքսը գնահատվում է 14,31 տոկոս, իսկ անվտանգությանը՝ 85,69 տոկոս։ Հարավային Կորեային հաջորդում են Սինգապուրը, Ճապոնիան, Հոնկոնգն ու Թայվանը։ Վրաստանը 6-րդ տեղում է հայտնվել։

Հրապարակված տվյալների համաձայն՝ աշխարհի ամենավտանգավոր երկիրն է ճանաչվել Վենեսուելան, որտեղ հանցավորության ինդեքսը 84,44 տոկոս է, իսկ անվտանգության ինդեքսը՝ 15,56 տոկոս։

Նշենք, որ Numbeo-ն կազմակերպություն է, որը զբաղվում է վիճակագրական տարբեր տվյալների ուսումնասիրությամբ, այդ թվում՝ հանցագործությունների տեմպերի, տարբեր երկրներում առողջապահության որակի եւ նմանատիպ ոլորտներին վերաբերվող հարցերով։