03-05-2014 12:30

՛՛Դեմ եմ՛՛-ը մայիսի 6-ին կսատարի աշխատանքից ազատված՝ Մետրոպոլիտենի երեք աշխատակիցներին

՛՛Դեմ եմ՛՛ քաղաքացիական նախաձեռնությունը մայիսի 6-ին հավաքվելու է Արաբկիր եւ Քանաքեռ-Զեյթուն ընդհանուր իրավասության դատարանի մոտ՝ պահանջելու դատարանից վերականգնել Մետրոպոլիտենի` կուտակայինի դեմ պայքարին միանալու համար աշխատանքից ազատված մեքենավարների ոտնահարված իրավունքները: Այս մասին նշված է նախաձեռնության ֆեյսբուքյան էջում:

՛՛Ինչպես հիշում եք, ամիսներ առաջ ընդդեմ «Կուտակային կենսաթոշակների մասին» ՀՀ օրենքի պարտադիր բաղադրիչի դեմ ելած` Երեւանի Մետրոպոլիտենի աշխատակիցներ Անդրանիկ Գեւորգյանը, Սեւակ Հովհաննիսյանը եւ Գագիկ Գալստյանը Մետրոպոլիտենի առջեւ բողոքի ակցիայից 2 օր հետո ազատվեցին աշխատանքից` նրանց նկատմամբ ղեկավարության կողմից վստահությունը կորցնելու` ՀՀ Աշխատանքային օրենսգրքի 113 հոդվածի 6-րդ մասի հիմնավորմամբ:

Վերջերս Մետրոպոլիտենի նախաձեռնությամբ նրանց հետ տեղի ունեցած հանդիպման ժամանակ` Մետրոպոլիտենի ղեկավարությունը «պահանջել է» տղաներից ներողություն խնդրել` ինչպես իրենք էին որակել` «իրենց արածի համար» ...

Մետրոպոլիտենի ղեկավարության այս կարգի ցինիկ պահվածքը առնվազն զարհուրելի է եւ անթույլատրելի:

Ուստի, միասին, համախմբված ս.թ. մայիսի 6-ին ժամը 11:00 սատար ենք կանգնելու մեր 3 ընկերներին` վերականգնելու իրենց իրավունքներն ու հայ աշխատավորի արժանապատվությունը, եւ մե'նք ենք պահանջելու Մետրոպոլիտենից ներողություն խնդրել մեր պայքարակից ընկերներից եւ դատարանից` վերականգնել իրենց ոտնահարված իրավունքները՛՛,- գրված է հայտարարության մեջ: