06-09-2016 10:18

Հայաստանն իր արտադրանքը կներկայացնի «Բանակ 2016» համաժողովում

Հայկական ռազմատեխնիկական ընկերությունների արտադրանքը կներկայացվի Մերձմոսկովյան շրջանում անցկացվող «Բանակ 2016» համաժողովի շրջանակում։

«Բանակ 2016» ռազմատեխնիկական միջազգային համաժողովը, որին կմասնակցի ռազմատեխնիկական հինգ հայկական ձեռնարկություն, մեկնարկում է երեքշաբթի Մերձմոսկովյան Կուբինկա ռազմակայանում։ Համաժողովին մասնակցում է ավելի քան հազար ռուսական ձեռնարկություն և կազմակերպություն, ինչպես նաև ավելի քան 80 արտասահմանյան պատվիրակություն։ Համաժողովը կտևի մինչև սեպտեմբերի 11-ը։

Կմասնակցեն գիտական կազմակերպությունների, ռազմաարդյունաբերական համալիրների ձեռնարկությունների ներկայացուցիչներ, ինչպես նաև` ռազմական և երկրորդական նշանակության ծառայությունների և արտադրանքի սպառողներ Ռուսաստանից և արտերկրից։ «Բանակ 2016»-ը սպառազինության ժամանակակից նմուշների, ռազմական և հատուկ տեխնիկայի ցուցադրման համար ամենամեծ հարթակն է»,- համաժողովի հյուրերին և մասնակիցներին դիմելով` ասել է ՌԴ պաշտպանության նախարար, բանակի գեներալ Սերգեյ Շոյգուն։

Նրա խոսքով` 140 հազար քմ տարածքում կլինեն ցուցահանդեսային տաղավարներ և բաց ցուցանմուշներ, պայմաններ կստեղծվեն սպառազինության և ռազմական տեխնիկայի ընթացքային, թռիչքային և կրակային հնարավորությունները ցուցադրելու համար։ «Ցուցահարթակներում իրենց ազգային ցուցանմուշները կներկայացնեն մեր գործընկերները ՀԱՊԿ-ից` Բելառուսը, Ղազախստանը և Հայաստանը», — ասել է ՌԴ պաշտպանության նախարարը։