Այսօր հրավիրված մամուլի ասուլիսի ժամանակ թուրքագետ Անդրանիկ Իսպիրյանը տեսակետ հայտնեց, ըստ որի Հայոց Ցեղասպանության ընկալման հարցում Թուրքիայում նկատվում են որոշակի դրական տեղաշարժեր: «Թուրքիայի հարապետության ստեղծումից հետո միայն 2005թ պատռվեց Հայոց ցեղասպանության մասին խոսելու տաբուն: 2005թ-ից Թուրքիայում պաշտոնապես թույլատրվեց համաժողովներում, սրահներում ցանկացած տեսանկյունից խոսել 1915 թ դեպքերի մասին: Սա կարևոր ուղերձ էր թուրք այլախոհ մտավորականությանն ու բնակչությանը»,-ընդգծեց Ա.Իսպիրյանը: Վերջինիս համոզմունք հայտնեց, որ Հայոց ցեղասպանության, հայության խնդիրների մասին Թուրքիայում բարձրաձայնելու հարցում բեկումնային նշանակություն ունեցավ նաև Հրանտ Դինքի մահը: «Քուրդ առաջնորդները, տեսնելով Ցեղասպանության հարցում իրականացվող քաղաքականության որոշակի մեղմացում, փորձելով իրենց տարանջատել ոճրագործության հեղինակներից և նրանց հետնորդներից, սկսեցին քննադատել Ցեղասպանությունը, Թուրքիային կոչ անել առերեսվել իրականության հետ: »,- նշեց թուրքագետը: Բանախոսը նաև նշեց, որ Ցեղասպանության ընկալման հարցում էական փոփոխություններ են տեղի ունեցել նաև թուրքական մտավորականության ջրջանում: Այնուհանդերձ, ըստ փորձագետի քանի դեռ կա Ցեղասպանության ժխտման թուրքական պետական քարոզչությունը, ցեղասպանության ընկալման հարցում թուրք հասարակության լայն շրջանակների մոտ որևէ շոշափելի առաջընթաց դժվար է ակնկալել: