ՀՀ արտաքին գործերի փոխնախարար Շավարշ Քոչարյանն այսօր կառավարության նիստից հետո լրագրողների հետ զրույցում ասաց, որ ԵՏՄ շրջանակներում սահմանային լարվածության հարցը չի քննարկվել, քանի որ ԵՏՄ-ն որևէ կապ չունի անվտանգության հետ: «Չի բարձրացվել այդ հարցը, քանի որ դա մաքուր տնտեսական բլոկ է: Իսկ ՀԱՊԿ վեհաժողովը նախագահների մակարդակով լինելու է սեպտեմբերի 15-ին, և ինչպես դուք լսեցիք, դրա մասին ասաց նաև մեր նախագահը՝ Ռուսաստանի նախագահի հետ հանդիպման ժամանակ, այնտեղ ևս այդ հարցի մասին կխոսվի»,- ասաց Շ.Քոչարյանը: Հարցին, թե ի՞նչ է ՀԱՊԿ-ից ակնկալում Հայաստանը, փոխնախարարը նշեց, որ մեր անվտանգության ու պաշտպանության հարցում առաջին հերթին հույսը պետք է դնենք մեզ վրա: «Ինչ վերաբերում է դաշնակից երկրների աջակցությանը կամ պայմանագրային պարտավորությունների կատարմանը, դա այլ բան է: Բայց մենք պետք է ունենանք այն գիտակցումը, որ որևէ երկիր, եթե իր պաշտպանության հույսը դնում է ուրիշի վրա, ներողություն, դա կարող է շատ տխուր ավարտ ունենալ»,- նշեց Շ.Քոչարյանը: Դիտարկմանը, թե Հայաստանի՝ ԵՏՄ-ին անդամակցելը Սերժ Սարգսյանը հիմնավորում էր նախ և առաջ անվտանգության երաշխիքով, փոխնախարարը շեշտեց, որ ԵՏՄ-ն որևէ կապ չունի անվտանգության հետ, դա տնտեսական բլոկ է: «Տնտեսական միավորի հետ կապել քաղաքական անվտանգության հարցը, դա ճիշտ չէ: Անվտանգության բաղադրիչը կայանում է նաև նրանում, որ քո տնտեսությունը շնչի, և այն մրցավազքը, որ կա սպառազինությունների, դու կարողանաս դրան դիմանալ: Դրա համար քեզ պետք են այնպիսի դյուրին հնարավորություններ՝ ապրանքները դուրս բերելու, առևտրի համար, որոնք հնարավորություն կտան, որ քո բյուջեն ի վիճակի լինի այդ ծախսերը կրելու: Այդ տեսակետից ԵՏՄ անդամակցությունը մեզնից չէր պարտադրում երկարատև ժամանակ՝ հարմարվելու համար, որպեսզի դու կարողանաս այդ գործընթացն իրականացնել»,- ընդգծեց Շ.Քոչարյանը:
Հարցին, թե արդյոք նախագահներ Սարգսյան-Պուտին հանդիպման ժամանակ քննարկվել է Լեռնային Ղարաբաղի խնդրի հետ կապված զիջումների հարցը, Շ. Քոչարյանն ասաց, որ զիջումների մասին խոսք լինել չի կարող: «Ի՞նչ զիջման մասին կարող է խոսք լինել: Կա գործընթաց՝ Մադրիդյան գործընթաց, կան համանախագահների հայտարարություններում դրա տարրերը, և դա մենք ընկալում ենք որպես մեկ միասնական փաթեթ, որտեղ կա և Ղարաբաղի կարգավիճակի հարցը, և անվտանգության երաշխքիների, և այլ հարցեր: Քանի որ Ադրբեջանը շեշտադրումը դնում է միայն այն հարցերի վրա, որն իրեն է ձեռնտու, այդ պատճառով առաջընթաց չկա և չի լինի այնքան ժամանակ, քանի Ադրբեջանն այդպես կվարվի: Իսկ խոսել միակողմանի զիջումների մասին, ուղղակի տարօրինակ է»,- ասաց Շ. Քոչարյանը: