Այսօր Ազգային Ժողովի նիստին ՀԱԿ պատգամավոր Նիկոլ Փաշինյանը հարց ուղղեց ՀՀ վարչապետ Հովիկ Աբրահամյանին՝ ասելով, թե Կառավարության ծրագրում հնչեղ խոսքեր են ներկայացված:
«Սերժ Սարգսյանը ժամանակին հայատարարել էր, որ գործարարությունը պետք է տարանջատվի Կառավարությունում պաշտոն զբաղեցնելուց, պաշտոնատար անձի գործունեություն ծավալելուց, բայց դուք ունեք 5,5 մլն դոլարի ունեցվածք, Գագիկ Խաչատրյանը հայատարագրել է 6, 5 մլն դոլար, Դավիթ Հարությունյանը ունի մի քանի առանձանտուն: Այս ցանկը կարելի է շարունակել: Դուք բոլորդ այդ ողջ ընթացքում պետական պաշտոնյաներ եք եղել, ո՞նց եք աշխատել այդ գումարները, եթե բիզնեսով չեք զբաղվել: Երկրորդ, դուք 5 տոկոս տնտեսական աճի թիրախն եք նշել ձեր ծրագրում ու նշում եք, որ դա նվազագույնն է: Բայց նվազագույնը սահմանել է Սերժ Սարգսյանը 2013-ինˋ ասելով, որ ՀՀ Կառավարությունում 2013-2017 թթ-ին, եթե Կառավարությունը 7 տոկոս տնտեսական աճ չապահովի, ապա հրաժարականի դիմում թող տա: Հիմա Նաջարյանի ասածը ձեզ համար ինչ նշանակություն ունի, էս 5 տոկոսը ձեր հրաժարականի դիմումն է»,-նկատեց Փաշինյանը:
Իսկ Հովիկ Աբրահամյանը որակեց պարոն Փաշինյանին սուր քննադատող եւ ասաց, որ անկախ նրանից, թե ինչ կասի Նիկոլ Փաշինյանը, նա չի հուսալքվում:
«Շատ մեծ տարբերություն կա գործ անողների եւ խոսողների միջեւ: Ինչու՞ եք գործարարներին վատ վերաբերվում: Գործարարների շնորհիվ է, որ դուք այստեղ նստած եք եւ աշխատավարձ եք ստանում: Գործարարների շնորհիվ է դպրոցների, հիվանդանոցների կառուցում լինում, նրանց վճարած հարկերի շնորհիվ է, որ թոշակառուները թոշակ են ստանում, կրթության, առողջապահության ոլորտում, բանակում մեր սպառազինությունների համար գումարներ են ծախսվում: Ինչու՞ եք փորձում գործարարներին հանրության առջև դարձնել բոբոներ: Այո, ես ունեմ ունեցվածք եւ ես չեմ թաքրցել: Ես հայտարարագրում ներկայացրել եմ, բայց այդ ունեցվածքը ձեռք եմ բերել, երբ հողագործությամբ եմ զբաղվել եւ չեմ եղել Կառավարությունում, կամ Ազգային Ժողովում: Օրենքի տառին համապատասխան եմ ձեռք բերել այդ ամենը»,-ասաց Հովիկ Աբրահամյանը:
Նրան հակադարձելով Նիկոլ Փաշինյանը հարցրեց, թե այդ ո՞նց է, որ Հայաստանում բոլոր գյուղացիները հող են մշակում, տոկոսի տակ են ընկնում, իսկ Հովիկ Աբրահամյանը հող մշակելով միլիոնների ունեցվածք է ձեռք բերել:
«Ուզում ենք հասկանալ դուք հիմա գործարար եք, թե՞ Կառավարության անդամ »,-ասաց Փաշինյանը, որից հետո հարցուպատասխանը վերածվեց վիճաբանությանը:
«էթիկա չունեք, տակտ չունեք, որ լսեք: Ու հիշեք, որ ուրիշի փողերը միշտ հեշտ է հաշվելը»,-փաստեց Աբրահմայանը: