Զավեշտալի եւ անբարոյական է, որ Ադրբեջանի նախագահը՝ Փարիզում տեղի ունեցած ահաբեկչական գործողություններից հետո, փորձում է մեղադրանքներ ներկայացնել Հայաստանին։ Այս մասին հայտարարել է Հայաստանի ԱԳ փոխնախարար Շավարշ Քոչարյանը՝ պատասխանելով «Ազատություն» ռադիոկայանի հարցին, թե ինչպե՞ս կմեկնաբանեք Ադրբեջանի նախագահի` Անթալիայում Հայաստանի դեմ հնչեցրած մեղադրանքները:
Նա մասնավորապես, նշել է.
«Դա անհաջող փորձ է՝ շեղելու միջազգային հանրության ուշադրությունը Ադրբեջանի եւ տարբեր ահաբեկչական ցանցերի միջեւ ավանդաբար գոյություն ունեցող անմիջական կապերից։
Բազմաթիվ փաստերից բերենք մի քանիսը.
- Ինքնորոշված Լեռնային Ղարաբաղի Հանրապետության դեմ սանձազերծված ագրեսիայում Ադրբեջանը ներգրավել էր հայտնի ահաբեկիչ Շամիլ Բասաեւի գլխավորությամբ հարյուրավոր գրոհայինների, ինչպես նաեւ Աֆղանստանից շուրջ երեք հազար վարձկաններ, այդ թվում՝ եւս մեկ հայտնի ահաբեկիչ Խաթաբի գլխավորությամբ։
- Միջազգային զեկույցներում արձանագրված փաստ է, որ 1995թ.-ից Բաքվում ակտիվորեն գործել է Ալ-Քաիդա ահաբեկչական խմբավորման ներկայացուցչությունը։
- 1998թ. Նայրոբիում ամերիկյան դեսպանության պայթեցումից հետո ամերիկյան հատուկ ծառայություններն արձանագրել են Բեն Լադենի վաթսուն հեռախոսազանգ դեպի Բաքու։
- ՄԱԿ-ի Անվտանգության խորհուրդը՝ իր 2002թ. նոյեմբերի 25-ի հայտարարությունում ընդգծել է Ալ-Քաիդայի հետ կապեր ունեցող կազմակերպությունների առկայությունը Ադրբեջանում։
- ԱՄՆ Կոնգրեսի եւ պետքարտուղարության զեկույցներում նշվել է, որ Ադրբեջանը ծառայում է որպես միջազգային ահաբեկչական խմբավորումների մատակարարման եւ տարանցիկ հենակետ։
- Ադրբեջանի հարյուրավոր քաղաքացիներ ակտիվորեն ներգրավված են Սիրիայում եւ Իրաքում ահաբեկչական գործողություններ իրականացնող խմբավորումներում, այդ թվում՝ «Իսլամական պետություն» ահաբեկչական ցանցում, որն իր վրա է վերցրել Փարիզում իրականացված զարհուրելի ահաբեկչությունների պատասխանատվությունը։
Էլ ի՞նչ կարելի է սպասել մի պետության ղեկավարից, ով հերոսացնում է մոլագար մարդասպաններին եւ մի ամբողջ ժողովուրդ իր երկրի թիվ մեկ թշնամին է համարում։