«Իրավունք» թերթը գրում է.
«Ըստ ՀՅԴ-ին մոտ կանգնած աղբյուրի՝ կուսակցությունը «քառյակի» ներսում վերջերս ոչ այնքան հաճելի կացության մեջ է ընկել: Պատճառն այն է, որ ներքին մակարդակով ԲՀԿ-ն, ՀԱԿ-ը եւ «Ժառանգություն» խմբակցության ղեկավար Ռուբիկ Հակոբյանը հանգել են այն եզրակացության, որ պետք է միասնաբար ընդունել Լեւոն Տեր-Պետրոսյանի առաջարկած՝ սահմանադրական բարեփոխումների կտրուկ մերժումը եւ անցնել նախապատրաստական աշխատանքների՝ նույն Լեւոն Տեր-Պետրոսյանի ասած «սահմանադրական հանրաքվեն դարձնենք ռեժիմի տապալման հանրաքվե» բանաձեւով գործելու համար:
Սակայն ՀՅԴ-ն արդեն վաղուց հասցրել է թիվ 1 կարեւորություն տալ հենց սահմանադրական բարեփոխումներին, ու այդ հարցում 180 աստիճանով տեսակետ փոխելը կհանգեցնի կուսակցության հեղինակազրկման: Բացի այդ, դաշնակները այնքան էլ չեն հավատում, որ «քառյակը» ի վիճակի կլինի տապալել խորհրդարանի աշխատանքները կամ կազմակերպել մեծածավալ հանրահավաքներ, ու ցանկություն չունեն ռիսկի տակ դնել սեփական բավականին բարվոք հարաբերությունները ՀՀԿ-ի հետ: Ինչեւէ, աստիճանաբար ՀՅԴ-ի ու մյուսների միջեւ կոնֆլիկտ է հասունանում»։