Թուրքիայի նորանշանակ վարչապետ Բինալի Յըլդըրըմը կարծում է, որ բունդեսթագում հունիսի 2-ին ծրագրված 1915 թվականին Օսմանյան կայսրությունում Հայոց ցեղասպանությունը ճանաչելու մասին օրինագծի քվեարկությունն անհեթեթ է։
Եթե բունդեսթագը ճանաչի Հայոց ցեղասպանությունը Գերմանիայի և Թուրքիայի հարաբերությունները կփչանան, ասել է Թուրքիայի վարչապետ Բինալի Յըլդըրըմը:
«Դա կասկածից դուրս է, սակայն մենք դա չենք ցանկանում», — նշել է վարչապետը։
Նա հույս է հայտնել, որ բունդեսթագը քվեարկության ժամանակ հաշվի կառնի գերմանական քաղաքացիություն ունեցող 3.5 մլն էթնիկ թուրքերի կարծիքը։
«Սակայն ի՞նչ է կատարվելու, եթե որոշումն ընդունվի։ Բացարձակ ոչինչ։ Անցյալում նման որոշումներ ընդունվել են մի շարք երկրներում։ Մեզ համար դա գործողություն է, որն օրենքի ուժ չունի», — ասաց վարչապետը։
Յըլդըրըմը նշել է, որ Թուրքիան այս քվեարկությունը անհեթեթ է համարում։
«Այդ իրադարձությունները տեղի են ունեցել Առաջին համաշխարհային պատերազմի տարիներին… Մենք գիտենք, որ նրանք, ովքեր ցանկանում են Թուրքիային մեղադրել, լավ մտադրություններ չունեն։ Բաց և հստակ հայտարարում ենք ամբողջ աշխարհին, որ մենք թաքցնելու ոչինչ չունենք այս հարցի վերաբերյալ, թող բազմակողմանի ուսումնասիրություններ անցկացվեն։ Թող բացահայտվեն յուրաքանչյուր երկրի սխալները։ Սակայն դա պետք է պատմաբաններն անեն։ Պատմական թեման քաղաքականության առարկա դարձնել, այդ թվում ներքին, արմատապես սխալ է», — հայտնել է Յըլդըրըմը։
XX դարի սկզբին Օսմանյան կայսրությունում ավելի քան 1.5 մլն հայ սպանվեց։ Թուրքիան ավանդաբար մերժում է հայերի մեղադրանքները ցեղասպանության իրագործման հարցում և այս հարցի վերաբերյալ քննադատությունն արևմուտքի կողմից բավական ցավագին է ընդունում։
Առաջինը Օսմանյան կայսրությունում Հայոց ցեղասպանությունը 1965 թվականին ճանաչեց Ուրուգվայը, որի օրինակին հետևեցին Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։
ԱՄՆ 50 նահանգներից 44-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։