Ադրբեջանը չի կարող դիմել ՄԱԿ-ի Անվտանգության խորհրդին՝ 1994թ.-ի հրադադարի մասին պայմանագրի չեղարկման համար. այս մասին ասել է ՀՀ արտաքին գործերի փոխնախարար Շավարշ Քոչարյանը:
«Նման բան գոյություն չունի, որ ՄԱԿ-ը չեղարկի պայմանագիրը: Հակառակը: ՄԱԿ-ի անդամ պետությունը պարտավոր է հարգել միջազգային պարտավորությունը: Դա ընդամենը փորձ է ձերբազատվել միջազգային պարտավորությունից: Ադրբեջանին ձեռք չի տալիս 94թ.-ի հրադադարի պայմանագիրը, որովհետև այնտեղ կա Լեռնային Ղարաբաղի Հանրապետության ստորագրությունը, ինչը նշանակում է, որ Ադրբեջանն առնվազն ընդունել է ԼՂ-ն որպես հակամարտության կողմ»,- շեշտեց Շավարշ Քոչարյանը:
Հիշեցնենք, որ ՀՀ ԱԳՆ-ի տարածած հաղորդագրության համաձայն` Ադրբեջանը նամակ էր ուղարկել ՄԱԿ-ին՝ հրադադարի մասին պայմանագրի չեղարկման պահանջով:
Հարցին, թե հնարավոր է, որ Ադրբեջանը շրջանառության մեջ է ուզում դնել հրադադարի մասին նոր պայմանագիր, դրա համար է ուզում չեղարկել 94թ.-ի կնքվածը, Շավարշ Քոչարյանը պատասխանեց. «Որևէ այլ պայմանագիր չկա: Ադրբեջանը հղում է անում բանավոր պայմանավորվածության վրա, բայց դա պայմանագիր չէ (նկատի ունի Մոսկվայում քառօրյա պատերազմից հետո հրադադարի մասին ձեռք բերված համաձայնությունը- խմբ.): Դա ընդամենը պայմանավորվածություն էր կապված նրա հետ, որ վերականգնվի 94թ.-ի խախտված ու կրակի դադարեցման մասին ռեժիմը»:
Անդրադառնալով Մոսկվայում ձեռք բերված այդ բանավոր համաձայնությանը և ՌԴ ԱԳ նախարար Սերգեյ Լավրովի՝ Երևան կատարած պաշտոնական այցից հետո հայկական ու ռուսական մամուլում չդադարող մեկնաբանություններին, որ Լավրովը Լեռնային Ղարաբաղի հակամարտության կարգավորման հարցում իր հետ առաջարկների փաթեթ է բերել, որոնք առանձին են ԵԱՀԿ Մինսկի խմբի առաջարկներից, ՀՀ ԱԳ փոխնախարարը հավաստիացրեց, որ Լավրովն իր հետ որևէ նոր առաջարկ չէր բերել:
Իսկ կարծիքներին, որ Ռուսաստանն իր ակտիվությամբ փորձում է Մինսկի խմբի աշխատանքը ստվերել, Շավարշ Քոչարյանն արձագանքեց այսպես. «Այո, 94թ.-ի պայմանագիրը հրադադարի մասին կնքվել է Ռուսաստանի միջնորդությամբ: Սա բնական է, քանի որ Ռուսաստանն այս տարածաշրջանը միշտ ընկալում է որպես իր ազդեցության գոտի: Այնպես որ այդ տեսանկյունից միշտ էլ այդ դերը եղել է: Իսկ պնդումը, որ նոր փաստաթղթեր է բերել, ներողություն, չի համապատասխանում իրականությանը: Նույնիսկ Լավրովի մամուլի խոսնակն է դա ասել նրա այցից առաջ ու ես չեմ հասկանում՝ ո՞ւմ կողմից է դա գալիս, այդ հետևողական…»:
Շավարշ Քոչարյանը վստահեցրեց, թե այս հարցում ամեն ինչ շատ պարզ է ու պետք չէ «մութ սենյակում սև կատու փնտրել, երբ կատուն չկա»: