«Միջազգային հանրությունը պետք է ավելի շատ ճնշում գործադրի Ադրբեջանի վրա, որը կոպտորեն խախտում է Ժնևյան կոնվենցիան»,-այսօր Ազգային Ժողովում լրագրողների հետ զրույցում նման համոզմունք հայտնեց խորհրդարանի փոխնախագահ Էդուարդ Շարմազանովը: Վերջինիս խոսքով՝ Լեռնային Ղարաբաղի Հանրապետությունը պետք է քայլեր ձեռնարկի պարզելու համար ղարաբաղա-ադրբեջանական շփման գծում ադրբեջանական զինուժի կողմից խոցված հայկական ուղղաթիռի անձնակազմի ճակատագիրը, սակայն, ըստ նրա, դրանք բացառապես կախված են Ադրբեջանի ղեկավարության պահվածքից:
«Թե ինչպիսին կլինեն արցախյան կողմի քայլերը, բացառապես կախված է Ադրբեջանի ղեկավարության կեցվածքից և իրականությունը սթափ գնահատելու Ադրբեջանի կարողությունից»,- ասաց նա:
Շարմազանովի խոսքով՝ Ադրբեջանը, թույլ չտալով մոտենալ խոցված ուղղաթիռին՝ պարզելու համար անձնակազմի ճակատագիրը, անմարդկային կեցվածք է ցուցաբերում, ինչը միջազգային հումանիտար իրավունքի, մասնավորապես՝ Ժնևյան կոնվենցիայի ակնհայտ խախտում է: «Մեկ անգամ ասել եմ, ևս մեկ անգամ պատրաստ եմ կրկնել, որ իրավիճակի հնարավոր սրման ամբողջական պատասխանատվությունն ընկնելու է բռնապետական Ադրբեջանի վրա», - նշեց նա: