04-12-2015 10:05

Ինչպես են օրն անցկացնում Ազատության հրապարակի ցուցարարները (լուսանկար)

Երևանի Ազատության հրապարակում այսօր առավոտյան հերթապահում էր Հիմնադիր խորհրդարանի քարտուղարության անդամ Գարեգին Չուգասզյանը, ով փոխարինել էր գիշերը այնտեղ անցկացրած՝ «Ժառանգություն» կուսակցության փոխնախագահ Արմեն Մարտիրոսյանին: Ինչպես հայտնեց ընդդիմության միասնական շտաբի վրանում նստած երիտասարդը` այս գիշեր հրապարակում գիշերել է 15-20 մարդ:



Վրաններ չէին տեղադրվել, թեպետ երեկ «Նոր Հայաստանի» քաղխորհրդի անդամ Անդրիաս Ղուկասյանը երեկ հայտարարեց` ի գիտություն, որ վրաններ կտեղադրվեն անկախ ամեն ինչից: Ծածկի տակ նստած Գարեգին Չուգասզյանը պատմեց, թե ինչով են զբաղվում Ազատության հրապարակում:


«Իրար ներկայությունն ենք վայելում, հետաքրքիր մարդկանց ներկայությունը, պատմություններ ենք պատմում կյանքից, Երևանի պատմությունից, չգրված պատմությունից, լավ երաժշտություն ենք լսում: Որակյալ մարդկանց հետ ենք շփվում: Եվ վերջապես` Երևանի ազատ մթնոլորտն ենք վայելում»,– ասաց նա: 
Նշենք, որ ծածկի տակ վերմակներ ու ծածկոցներ կային։ Շտաբում հերթապահող երիտասարդը ասաց, որ մարդիկ մեծ քանակությամբ տաք հագուստ, ծածկոցներ ու կերակուր են բերում: