19-12-2014 09:08

Դադարեցվել է «Թերաֆլյու»-ի շրջանառությունը

Հիմք ընդունելով Հայաստանի Հանրապետության կառավարության 2002 թվականի օգոստոսի 15-ի N 1300-Ն որոշմամբ հաստատված Հայաստանի Հանրապետության առողջապահության նախարարության կանոնադրության 12-րդ կետի «դ» ենթակետը, գրանցման հավաստագրի իրավատիրոջ գրությունը, ՀՀ ԱՆ «Դեղերի և բժշկական տեխնոլոգիաների փորձագիտական կենտրոն» ՓԲԸ-ի 2014 թվականի դեկտեմբերի 11-ի թիվ 0101143514 գրությունը, ՀՀ առողջապահության նախարարի 2014 թվականի դեկտեմբերի 18-ի թիվ 2999-Ա հրամանով դադարեցվել է Ֆրանսիայի, Ֆամար Օրլեանս դեղագործական ընկերության արտադրության (գրանցման հավաստագրի իրավատեր` Նովարտիս Քոնսումեր Հելթ Ս.Ա., Շվեյցարիա) «Թերաֆլյու էքստրա խնձորի և դարչինի համով (պարացետամոլ, ֆենիրամին (Ֆենիրամինի մալեատ), ֆենիլէֆրին (Ֆենիլէֆրինի հիդրոքլորիդ), ներքին ընդունման լուծույթի դեղափոշի, 650մգ+20մգ+10մգ, 21.78գ փաթեթիկներ(10)» դեղի ներմուծված F1855 սերիայի շրջանառությունը Հայաստանի Հանրապետությունում: Նախարարի հանձնարարականով՝ տվյալ դեղը ներմուծող դեղագործական կազմակերպությունները պետք է հանրապետության տարածքում գործող դեղատներից և բժշկական կազմակերպություններից հետ հավաքեն առկա բոլոր խմբաքանակները:

Ինչպես պարզաբանեց Առողջապահության նախարարի մամլո խոսնակ Անահիտ Հայթայանը, դեղը շրջանառությունից հանելու պատճառը Մոլդովա առաքված խմբաքանակում պարացետամոլի` նորմայից պակաս քանակությունն է: Ըստ Հայթայանի` Հայաստան առաքված խմբաքանակի առնչությամբ կասկածներ չկան, բայց քանի որ Մոլդովա եւ Հայաստան առաքվել է նույն` F1855 սերիայի «Թերաֆլյու», արտադրող ընկերությունը հետ է հավաքում այն: