21-10-2015 09:24

Աստերոիդների սպառնալիքը չափազանցված է.Գիտնական

Երկրի համար աստերոիդների սպառնալիքը չափազանցված է, մոլորակն աստերոիդներից պաշտպանելու համար խոշոր գումարներ ծախսելն անիմաստ է, քանի որ մարդկության պատմության ընթացքում չի գրանցվել որևէ մահվան դեպք, որը կապված կլներ մետեորիտի կամ աստերոիդի ընկնելու հետ: Այս մասին ասել է ՄՊՀ Շտերնբերգի անվան պետական աստղագիտական ինստիտուտի գիտաշխատող Նիկոլայ Պոդորվանյուկը: Ավելի վաղ NASA-ի մասնագետները հայտարարել էին, որ հոկտեմբերի 31-ին Երկիր մոլորակին հսկայական աստերոիդ է մոտենալու, որը չափազանց մոտ տարածության վրա է գտնվելու մեր մոլորակին, և այդ հեռավորությունը ռեկորդային է լինելու վերջին 9 տարվա կտրվածքով: Երկնային մարմինը շարժվում է 35 կմ/վ արագությամբ: 2015 TB145 անվանումը ստացած օբյեկտը կանցնի մեր մոլորակի մոտով 499 հազար կիլոմետր տարածության վրա, ինչը վտանգավոր չէ Երկրի համար: «Չելյաբինսկում մետեորիտի ընկնելու հետևանքով մարդիկ վնասվածքներ էին ստացել, բայց դրանց պատճառը պայթյունի հետևանքով կոտրված ապակիներն էին, ոչ թե մետեորիտը: Աստերոիդներն ու մետեորիդներն այնքան հազվադեպ են ընկնում Երկիր մոլորակ, որ իմաստ չունի պաշտպանվելու կամ նույնիսկ խոշոր գումարներ ծախսելու մասին մտածել»,- ասել է զրուցակիցը: Նրա խոսքով` տարբեր չափսերի տիեզերական մարմինները մշտապես մոտենում են Երկրին: Եվ եթե տասնյակ տարիներ շարունակ այդ մասին կարելի էր միայն գուշակություններ անել, ապա այսօր մշտապես վերահսկվում է Երկրին շրջապատող տարածքը. աշխատում են մի շարք ռոբոտ-հետադիտակներ` միավորված գլոբալ համակարգերի մեջ, ինչպես նաև մշտապես աճում է սիրողական աստղագետների թիվը: «Իհարկե, Երկիրն ապահովագրված չէ այնպիսի մետեորիտներից, ինչպիսին Չելյաբինսկում էր, և հասկանալի չէ, թե ինչպես կարելի է հետևել այդ մարմիններին, երբ դրանք Երկին են մոտենում են Արևի կողմից»,- նշել է գիտնականը: Սակայն աստղագետը ևս մեկ անգամ շեշտել է, որ կոնկրետ 2015 TB145 աստերոիդը ոչ մի վտանգ չի ներկայացնում: