ՀՀ վարչապետ Հովիկ Աբրահամյանը այսօր կառավարության նիստի մեկնարկին կառավարությանը հարց ուղղեց, թե ինչու են «Նաիրիտ» գործարանի աշխատակիցները կրկին դժգոհ կառավարությունից, հատկապես եթե կառավարությունը նրանց տված խոստումը կատարել է:
Էներգետիկայի և բնական պաշարների նախարար Երվանդ Զախարյանն ի պատասխան տեղեկացրեց, որ պայմանավորվածություն էր ձեռք բերվել մինչև այս տարվա հուլիսի 15-ը վճարել նաիրիտցիների աշխատավարձերի կուտակված պարտքը, որը կազմում է մոտ 5 մլրդ 310 մլն դրամ:
«Մենք այսօր հնարավորություն ունենք պարտքը վճարել: Մի շարք աշխատակիցներ, սակայն, անհանգստացած են, քանի որ կարծում են, որ իրենց աշխատավարձերը սխալ են հաշվարկվել: Այդ ուղղությամբ այժմ աշխատանքներ են կատարվում»,- «Արմենպրես»-ի փոխանցմամբ` ասաց նախարարը և ավելացրեց, որ առաջիկա օրերին այդ հարցը կլուծվի:
Երվանդ Զախարյանը նաև փոխանցեց, որ աշխատակիցները ցանկանում են աշխատավարձը միանգամից ստանալ, սակայն, նրա խոսքով, այս դեպքում նրանք ստիպված են լինելու մոտ տասնհինգ օր սպասել:
Արձագանքելով երկխոսությանը` ՀՀ Ազգային անվտանգության ծառայության տնօրեն Գորիկ Հակոբյանը փորձեց պարզաբանել, թե ինչու են նաիրիտցիները ցանկանում աշխատավարձը միանգամից ստանալ: «Մտածում են, որ դուք կվճարեք 200 հոգու աշխատավարձ, և գումարը կավարտվի: Չկա վստահություն մեր իշխանությունների նկատմամբ: Ասում են, կհասնեք 20–ին կամ 25–ին, կասեք, փող չկա: Ո՞վ կարող է ասել, որ բոլորը կստանան: Պետք է երաշխիք տանք, որ մինչև ամսվա վերջ բոլորը կստանան ու համոզված եմ, որ էլ չեն հավաքվի»,- ասաց Հակոբյանը:
Երվանդ Զախարյանը ամբիոնից հայտարարեց, որ եթե կոլեկտիվի անդամները պատրաստակամ են մինչև ամսվա վերջ սպասել, ապա կառավարությունը միանգամից կվճարի բոլոր աշխատավարձերը: «Իսկ նրանց, ովքեր ցանկանում են այժմ ստանալ, պատրաստ ենք նաև այս ընթացքում կատարել վճարումները: Մենք համաձայն ենք երկու տարբերակին էլ»,- ասաց Զախարյանը, իսկ վարչապետն էլ հավելեց` թող իրենք որոշեն, մեզ ասեն:
Բավ է պառակտվել