22-09-2016 11:54

ՀՀ վարչապետ.վերամշակող ձեռնարկություններում ունենք ժանգոտած կառավարման համակարգ

ՀՀ վարչապետ Կարեն Կարապետյանը հինգշաբթի կառավարության նիստի ժամանակ հայտարարեց, որ հանրապետության վերամշակող ձեռնարկություններում առկա է բավականին ժանգոտած կառավարման համակարգ։

Նա հանձնարարեց գյուղատնտեսության նախարարին կազմակերպել խաղողի մթերման գործընթացը։

«Մենք ամեն տարի այս խնդրի առաջ կանգնում ենք և ամեն տարի այս խնդիրն ակտուալ է: Հարկավոր է մշակել երկարաժամկետ հայեցակարգ», – ասաց Կարապետյանը։

Նա հիշեցրեց, որ այսօր սա ակտուալ խնդիր է Վայոց Ձորի Աղավնաձոր գյուղում, որտեղ «Վեդի Ալկոն» ունի պարտավորություններ, որը չի կատարել:

Վարչապետը նաև նշեց, որ քննարկվում են տարբեր տարբերակներ այդ խնդիրը լուծելու համար։

«Ես համոզված եմ, որ պետությունը լավագույն և էֆեկտիվ կառավարիչը չէ, բայց այս պահին մենք որոշակի կերպով նոր մշակույթով պետք է ներկայանանք», – ասաց Կարապետյանը։

Նա նաև ընդգծեց, որ իր խորհրդական Հայկ Դավթյանը ներկայացրել է նոր մոտեցումներ` ամենօրյա վերահսկողության իրականացում։

«Մենք մեր վերամշակող ձեռնարկություններում ունենք, ինձ թվում է, բավականին ժանգոտած կառավարման համակարգ: Մանրամասն դրա մասին կխոսենք», – ասաց Կարապետյանը։