Առաջին անգամ ռուս հանրությանը կներկայացվեն ցուցանմուշներ Հայաստանի երեք առաջատար թանգարաններից ։ Դա հնարավորություն կտա այցելուներին ավելի լավ ծանոթանալ հարուստ հայկական մշակույթին
Ռուսաստանի և Հայաստանի մշակույթի նախարարներ Վլադիմիր Մեդինսկին և Հասմիկ Պողոսյանը հինգշաբթի Մոսկվայի պատմության պետական թանգարանում բացեցին «Հայաստան. գոյության լեգենդ» ցուցահանդեսը, որտեղ ներկայացված է 160 եզակի ցուցանմուշ Հայաստանի երեք առաջատար թանգարաններից` Հայաստանի պատմության, Մայր Աթոռ Սուրբ Էջմիածնի թանգարաններից և Հին ձեռագրերի թանգարան-ինստիտուտից` Մատենադարանից։
«Այն փաստը, որ հայկական պետության զարգացման ողջ ընթացքն ընդգրկող 160 ցուցանմուշները ներկայացված են այստեղ, նշանակալի է։ Այն, որ այդ նմուշներն այստեղ են, խոսում է հատուկ վստահության և ջերմության մասին»,- ցուցահանդեսի բացման ժամանակ ասաց Մեդինսկին։
«Մեզ համար մեծ պատիվ է երկար տարիների բացակայությունից հետո ցուցադրվել Պատմության թանգարանում։ Երկրների միջև մշակութային համագործակցությունը շատ կարևոր դեր ունի, այդ կապերը յուրահատուկ հարթության վրա են գտնվում»,- նշեց Պողոսյանը։
Նա պատմության թանգարանի տնօրեն Ալեքսեյ Լևիկինին պարգևատրեց Հայաստանի մշակույթի նախարարության ոսկե մեդալով` Հայաստանի և Ռուսաստանի միջև մշակութային կապերի զարգացման համար։
«Հայաստան. գոյության լեգենդ» ցուցահանդեսում առաջին անգամ լայն հանրությանը եզակի ցուցանմուշներ են ներկայացվել Հայաստանի երեք առաջատար թանգարաններից։
Հայաստանի պատմության թանգարանից Մոսկվա են տեղափոխվել մանրանկարչական սրբապատկերներ, մ.թ.ա II դարավերջի Աֆրոդիտե աստվածուհու մարմարե քանդակը, Ուրարտուի թագավորության ժամանակաշրջանի սաղավարտ, վահան և կապարճ` զարդարված գրություններով և պատկերներով։
Ցուցահանդեսում ներկայացված են նաև եկեղեցական իրեր Էջմիածնի թանգարանից։