19-09-2016 11:45

«Հայոց ցեղասպանության ժխտումն անթույլատրելի է».Քիմ Քարդաշյան

Քիմ Քարդաշյանը բացի Նյու Յորքում ու Մայամիում իր էպատաժային տեսքով հասարակությանը ցնցելուց, չի մոռանում նաեւ իր արմատների մասին:

Շաբաթ տպագրվել է Քիմի հոդվածը, որում նա «հարձակվել է» Օսմանյան կայսրությունում Հայոց ցեղասպանությունը ժխտելու մասին թուրքամետ հոդվածի վրա:

«Հայոց ցեղասպանության ժխտումը անթույլատրելի է»- այսպես է վերնագրված Քիմի հոդվածը:

«Ես ու իմ ընտանիքը քաջ ծանոթ ենք այն հիմարություններին, որը մամուլում գրում են մեր մասին: Բայց երբ ես իմացա, որ Wall Street Journal –ի մի ամբողջ էջ նվիրված է եղել նման հոդվածի, ես չէի կարող անտարբեր մնալ: Այդ ստերը լավ վերնագրեր են ապահովում, իսկ լավ վերնագրերը՝ լավ վաճառք: Այդ հոդվածի համար վճարել ու այն առաջ է մղել համացանցում թուրքական պլատֆորմը, որի անունը չեմ ուզում տալ, այն չգովազդելու համար: Նրանք վստահեցնում են, որ այդքան էլ շատ հայեր չեն զոհվել ու որ նման ողբերգություն չի եղել: Եվ ամենակարեւորը նրանք վստահեցնում են, որ հայերն իրենք են մեղավոր: Շատ տխուր է, որ նման բան է տպագրվում, քանի որ նման բան կարող էր միայն փողոցային տաբլոիդը տպագրել: Ամսագիրը վստահեցնում է, որ իրենք այդ հոդվածը գովազդի էջին են տպագրել, իսկ այդ էջի համար ընդունվում է ցանկացած տեղեկություն, նույնիսկ սադրիչ բնույթի: Բայց սեփական էջերին նման հոդված զետեղելը, հոդված մի երկրից, որը ժխտում է Ցեղասպանությունը, անպատասխանատու ու անբարոյական արարք է: Շատ պատմաբաններ վստահ են, որ եթե Թուրքիան ժամանակին պատասխան տար Ցեղասպանության համար, Հոլոքոսթ չէր լինի: Հիտլերը մինչեւ Լեհաստան ներխուժելը ասել էր. «Ո՞վ է հիմա հիշում հայոց ցեղասպանության մասին»:

Մենք հիշո՛ւմ ենք, մենք պետք է խոսենք այդ մասին, մինչեւ մեր կառավարությունն էլ ճանաչի այն: Ժխտելով անցյալը՝ մենք ապագան ենք վտանգում՝ ինքներս մեզ լռեցնում ենք փողով ու վախով ու երեխաներին սովորեցնում, որ ճշմարտությունը հարաբերական է: Մենք պետք է պատասխանատվություն ստանձնենք նրա համար, ինչ սովորեցնում ենք մեր երեխաներին: Մենք պետք է հարգենք պատմական ճշմարտությունները, այդպե՛ս մենք կպաշտպանենք մեր ապագան»- գրել է Քիմը: