Հանրաճանաչ ռուս էստրադային երգիչ, ԽՍՀՄ ժողովրդական արտիստ Իոսիֆ Կոբզոնը ելույթ կունենա Երևանում «Հայ մեծ կոմպոզիտորների սիրված երգեր» բարեգործական մենահամերգով, հաղորդում են համերգի կազմակերպիչները:
Համերգը տեղի կունենա դեկտեմբերի 4-ին «Արամ Խաչատրյան» համերգասրահում: ՌԴ ժողովրդական արտիստ, դաշնակահար Ալեքսեյ Եվսյուկովի նվագակցությամբ, երգիչը կկատարի հայ մեծ կոմպոզիտորներ Առնո Բաբաջանյանի, Միքայել Թարիվերդիևի, Ալեքսեյ Հեքիմյանի, Անդրեյ Բաբաևի և այլոց հայտնի ու սիրված երգերը:
Համերգը տեղի կունենա Հայաստանի հանրապետության առաջին տիկին Ռիտա Սարգսյանի բարձր հովանու ներքո: Համերգի ողջ հասույթը կփոխանցվի «Նվիրիր կյանք» բարեգործական հիմնադրամին:
«Նվիրիր կյանք» բարեգործական հիմնադրամը գործում է Հայաստանում 2009 թ.-ի դեկտեմբերից: Հիմնադրամի նպատակն է քաղցկեղով հիվանդ երեխաներին ապահովել դեղամիջոցներով, դոնորական արյունով և բուժման համար անհրաժեշտ այլ միջոցներով, որոնք նրանց ծնողները չեն կարող ձեռք բերել: