Ռուս անվանի դիմահարդար Գոհար Ավետիսյանն ամուսնացել է գործարար Վահիկ Մարտիրոսյանի հետ։ Հարսանեկան արարողությունը տեղի է ունեցել Հայաստանում։ Հարսանիքին ներկա են եղել բազմաթիվ հյուրեր, այդ թվում` Ավետիսյանի ընկերուհին`ազգությամբ ադրբեջանցի, ռուսաստանցի ոճաբան Նազիլա Մեհդիևան։ Այն փաստը, որ Մեհդիևան մասնակցել է Ավետիսյանի հարսանեկան արարողությանը, մեծ աղմուկ է բարձրացրել Ադրբեջանում, մասնավորապես` սոցիալական ցանցերի օգտատերերի շրջանում։ Ոճաբանը նյարդայնացել է քննադատություններից և այդ կապակցությամբ գրառում կատարել Istagramm սոցիալական ցանցում։
«Բարի լույս բոլորին։ Իմ գրառումը նվիրում եմ սկանդալներին, ինտրիգներին ու հետազոտություններին։ Ես չգիտեի, որ բուռն արձագանքի կարժանանամ ադրբեջանցիների և ադրբեջանական ԶԼՄ-ների կողմից։ Բոլորին միանգամից պատասխանեմ. ես ծնվել եմ Ռուսաստանում և ունեմ ՌԴ քաղաքացիություն։ Կարող եմ մեկնել ինչպես Ադրբեջան, այնպես էլ Հայաստան, և ոչ ոք ոչինչ չի կարող ասել, ամեն ինչ հանգիստ ու լավ է, ոչինչ պետք չէ հորինել։ Ես կարող էի չանել այս գրառումը, պարզապես նյարդայնացա, որ դուք անդրադառնում եք իմ ընտանիքին, երեխաներին։ Այո, ես զտարյուն ադրբեջանցի եմ, իսկ այն, որ ձեզ զայրացրել է ընկերուհուս հարսանիքին Երևան մեկնելը, չեմ կարող հասկանալ, ի՞նչ կա դրա մեջ։ Իսկ ինչու՞ եք լռում, երբ այնտեղ են մեկնում քաղաքական գործիչները, մարզիկները և սովորական մարդիկ։
Հանդարտվեք, կրկես մի սարքեք, չէ՞ որ դուք մարդիկ եք, ոչ թե ոչխարների հոտ, ավելի բարի եղեք, ունեցեք ձեր կարծիքը, կախված մի եղեք քաղաքականությունից։
Ի՞նչ եք խոսում. Ի՞նչ տարբերություն, թե ես ուր և ինչու եմ մեկնել։ Ապրեք ձեր կյանքով։ Այն, որ այնտեղ եմ մեկնել, իմ իրավունքն է։ Դա իմ ընկերուհու հարսանիքն է։ Կներեք, բայց ինձ թվում է, որ փոքրոգություն է ընտրել ընկերներին՝ ելնելով նրանց ազգային պատկանելությունից։ Եթե նա լավ մարդ է, բայց հայուհի է, ուրեմն վե՞րջ, նրա հետ չի՞ կարելի ընկերություն անել, նա զինվորների՞ է սպանել։ Վերջացրեք։ Բոլորս ենք խաղաղություն, բարություն կամենում։ Իսկ դուք ինձ չճանաչելով վիրավորում եք։ Ինքներդ կարդացեք, թե ինչ եք գրել։ Ես այնքան վատն եմ, որ ընկերուհուս հարսանիքին Երևան եմ գնացել, իսկ դուք բոլորդ այնքան լա՞վն եք։ Սկզբում տեսեք, թե ինչպիսի կեղտ է հոսում ձեր կողմից։ Հուսամ՝ բոլորին հասավ, հանդարտվե՛ք արդեն»։